24 жылға сотталған бұрынғы ұлттық экономика министрі Қуандық Бишімбаев таяуда Астанадағы тергеу изоляторынан жазасын өту орнына ауыстырылды. Ол өндіріске жұмысқа тұрса, колонияда қанша табыс таба алатыны анықталды, — деп хабарлайды astana-akshamy.kz
Еңбекке уақытша ақы төлеу кезінде сотталғандардың жалақысы белгіленген тарифтік мөлшерлемеге немесе нақты жұмыс істеген уақыты үшін жалақыға сәйкес есептеледі. Еңбекке ақы төлеу кезінде ақша орындалған жұмыстың немесе өндірілген өнімнің әрбір бірлігі үшін төленеді.
«Қылмыстық-атқару жүйесі кәсіпорындарында немесе шаруашылық жүргізуші субъектілерде жұмыс істейтін бір сотталушының жалақысы орташа есеппен 25-200 мың теңге болады», — деп хабарлады Қылмыстық-атқару жүйесі.
Сондай-ақ, комитет мәліметінше, Қазақстанның колонияларында атқару парақтары бар сотталғандарды жұмысқа орналастыру шаралары бірінші кезекте атқарылып жатыр.
«Олардың жалақысынан заңмен белгіленген мөлшерде (еңбекақыдан немесе өзге де кірістің кемінде елу пайызы) ай сайынғы ұсталымдар жасалады. Осылайша, келтірілген залалды өтеу тікелей сотталғандардың табысына байланысты», — деп толықтырды комитет.
