Астана қаласының Әкімшілік соты көші-қон саласындағы заңнаманы бұзғаны үшін шетелдік 1 548 азаматты кінәлі деп таныды.
Астана қаласының мамандандырылған ауданаралық әкімшілік сотында 2016 жылдың бірінші тоқсанында шетел азаматтарының Қазақстан Республикасының халықтың көші-қон саласындағы заңнамасын бұзғаны үшін 1548 азаматқа қатысты әкімшілік істер қаралды. Бұлар – Ресей Федерациясы, Өзбекстан, Қырғызстан, Грузия, Украина азаматтары екені анықталды.
Қазақ елі миграциялық процестер белсенді жүретін транзиттік мемлекет болып отыр. Әсіресе, Орта Азиядан мыңдаған адам жұмыс табу мақсатында елімізге ағылады. Көрші елдердегі саяси ахуал мен азаматтарын жұмыспен қамту мүмкіндіктерінің шектеулілігі де мигранттардың артуына себеп. Олардың арасында заңнаманы бұзатындар да баршылық. Уәкілетті органдар заңды қонышынан басқандарға қатысты Әкімшілік құқық бұзушылықтар туралы кодекстің 517-бабы бойынша әкімшілік құқық бұзушылық туралы хаттамалар толтырған.
Астана қаласының мамандандырылған ауданаралық әкімшілік сотының қаулыларымен 1534 азамат әкімшілік құқық бұзушылықты жасағаны үшін кінәлі деп танылды. 14 әкімшілік іс тоқтатылса, 702 азаматқа әкімшілік айыппұл салу, 180 азаматты қамаққа алу және 651 азаматты Қазақстан Республикасының шегiнен әкімшілік жолмен шығарып жiберу түрінде жаза тағайындалды.
Қымбат НҰРҒАЛИ
