Астана халқын маусымаралық азық-түлікпен қамтамасыз ету – бүгінгі күннің өзекті мәселелерінің бірі. Бұл бағытта қала басшылығы тарапынан да атқарылып жатқан шаруа қыруар. Бағаны тұрақты ұстау, азық-түлік белдеуін қалыптастыру үнемі қадағалау мен мығым істі қажет етеді. Осы орайда, Астана қаласы Ауыл шаруашылығы басқармасының бастығы Мұрат Далабаевты әңгімеге тартып, аз-кем тілдесудің сәті түскен…
– Нан бағасының қымбаттамауы, тұрақтылығы астаналықтардың көкейіндегі бірінші мәселе. Сіз не айтасыз?
– Астана қаласының әкімдігі мен сауда объектілері және наубайханалар арасында 1 сұрыпты нанға және ұнға бағаның өсуін болдырмау мақсатында шекті бағаны бекіту туралы Меморандумға қол қойылған. Нәтижесінде 1 сұрыпты ұнның келісі 45 теңгеден, бөлшек желісінде 50 теңгеден артық емес бағамен сатылуда. Сондықтан бұған алаңдаудың қажеті жоқ деп білем. Тағы айта кетерлігі, 1 тамызда былтырғы жылдың осы кезеңімен салыстырғанда, азық-түлік тауарларын тұтыну бағасының өсу индексі 2,2 пайызға төмендеген.
– Онда өткен жылдың күзінде қалыптастырылған азық-түлік қоры да біршама өскен болар?..
– Иә, ең төменгі бағалар бойынша 795,2 миллион теңгеге 6 928 тонна күріш, қант, өсімдік майы, ұнтақ жармасы, арпа жармасы, сұлы жармасы, қарақұмық жармасы, картоп, пияз, сәбіз сатып алынды. Осы өнімдер жыл бойы супермаркеттер, сауда жүйелері және әлеуметтік павильондар арқылы өткізілуде. Бұл қала нарығында бағаның тұрақтылығына әсерін тигізді деген ойдамын. Бұл жұмыс жыл сайын жүзеге асырылатын болады, қазіргі уақытта 2012-2013 жылдарға тұрақтандыру қорын қалыптастыру жүргізілуде.
– Маусымаралық көкөніспен қалалықтарды қамтамасыз етуде сақтау қоймаларының да маңызы зор. Бұл бағытта қандай жұмыс істеп жатырсыздар?
– Қала территориясында көкөніс қоймаларын және жылыжайлар салу елордалықтарды өз өнімімізбен қамтамасыз етеді. Қала тұрғындарын жеміс-көкөністен тарықтырмау үшін сақтау көлемі 60 000 тоннадан кем емес қойма қажет. Қазіргі уақытта жалпы көлемі 19000 тонналық 4 көкөніс қоймасы жұмыс істеуде. Оның 2-уі ағымдағы жылы пайдалануға енгізілді. Алдағы қыркүйек айында қажеттілікті 46 пайызға дейін қамтитын, көлемі 8850 тонналық тағы 2 жобаны аяқтау жоспарлануда. Сонымен қатар, 2013 жылы қаланы 100 қамтамасыз ететін 40600 тонналық 8 жобаға жер телімдері бөлінді және жобалық жұмыстар жүргізілуде.
– Жылыжайлар салу соңғы жылдары еліміздің жер-жерінде мықтап жолға қойылды. Астанада да ауыз толтырып айтарлықтай шаруалар жүзеге асқан болар?..
– Бүгінде елордада «АстанаЭкоСтандарт» ЖШС және «Наурзалина» жылыжай кешендері жұмыс істейді. Олардың өнімдері сәуір айынан бері нарықта. Ағымдағы жылы қуаттылығы 800 тонналық 1 жобаны аяқтау жоспарлануда. 2013 жылы да жылына 3500 тонна өнім беретін 3 жылыжай пайдалануға берілмек.