«ҚЫМЫЗМҰРЫНДЫҚ» ҚЫЗЫҚТАРЫ
Астана күні мерекесі аясында «Жерұйық» саябағында 5 және 6 шілде аралығында «Қымызмұрындық» халықаралық этнографиялық фестивалі өтеді.
Бабаларымыз қасиетті қымызды «ішсең – сусын, жесең – ас» деп тегін айтпаған. Оның емдік қасиеті де мол. Кейінгі кезде оны әлем ғалымдары дәлелдеп, анықтап жазып жүр.
Еліміз егемендік алғаннан кейін жаңаша өріс алып, кең түрде өтіп келе жатқан этнографиялық мерекенің орны бөлек. Әсіресе, айтулы шара Алматы, Павлодар, Тараз, Шымкент және тағы басқа қалаларда жоғары деңгейде өткізіліп жүр.
Ал елордада болатын фестивальдің тақырыбы – ел тәуелсіздігінің 25 жылдығы мен «ЭКСПО – 2017» халықаралық көрмесіне арналып отыр.
Шара аясында «Жерұйық» саябағына бірнеше ақбоз үй тігіліп, ұлттық тағамдардан тұратын мол дастархан жайылады. Қонақтарға қымыз бен шұбат ұсынылады. Боз талға қайнаған сары самаурыннан шай ішуге болады. Ұлттық дәстүрімізді дәріптейтін қолданбалы өнер көрмесін тамашалайсыз. Этно ауылда жігіттер мен қыздар алтыбақан теуіп, сауық-сайран құрады. Ауылдың алты ауыз өнерпаздары да халық әндерін шырқайды.
Балуандар мен батырлар күш сынасып, шеберліктерін көрсетеді. Ұлттық спорттың да көрігі қызады. Қысқасы, ертедегі қазақы ауылдың бейнесін көз алдымызға әкелетіндей ғажайып мереке болмақ.
Фестивальдің ашылуында қымызды насихаттауға арналған театрландырылған қойылым көрсетіледі. Қатысушылар қымыздың тарихымен танысып, ұлттық сусын ішуден жарысады. Қымызға арналған ата-бабамыздың жөн-жоралғысы жасалады.
Оған елімізден басқа Қырғызстан және Ресей елінен Қалмақ, Алтай, Новосібір, Якутия, Байкөл аймағы және Бурятиядан келген шеберлер қатысады деп күтілуде.
Этноауыл қонақтары Якутия жұртының қалыңдықты киіндіру жорасын, Байкөл аймағының өкілі Дарима Жалсанованың жылқының қылынан жасаған дүниелерін, қазақстандық шебер Қайролла Әбішевтің коллекциясын және Ханда Шадапованың «Байкөл маржандары» атты киім үлгілерін қызықтайды. Сондай-ақ, «Алтын дала дауысы» бүкілресейлік байқауының лауреаты, қалмақ әндерін орындаушы Эврена Оргаева мен алтай хомусында ойнайтын Виктор Игнатьевтің өнерін тамашалайды.
Түйіндей келгенде, мереке аясында аталарымыздың байырғы дәстүрі тағы бір жаңғырып, жас ұрпақ қадір тұтар тағылымды дүние болмақ.
Азамат ЕСЕНЖОЛ