Қысқы триатлон қызығы
Триатлон паркте қысқы триатлоннан жарыс өтті. Шараға 18 және одан жоғары жастағылар қатысты. Турнир үш кезеңнен өтті: 2,5 км жүгіру, веложарыс және шаңғымен сырғанау.
Оған кәсіби спортшылар да, әуесқойлар да қатысты. Жарысты Нұр-Сұлтан қаласының Дене шынықтыру және спорт басқармасы мен елордалық триатлон қауымдастығы ұйымдастырды.
Қысқы триатлон жарысына 150 адам қатысты. Қатысушылар деңгейіне байланысты екі топқа бөлінді – кәсіпқойлар мен әуесқойлар. Турнир елордада бұқаралық спортты насихаттау және дамыту мақсатында өткізілді.
«Жарыс қайырымдылық шарасы ретінде ұйымдастырылды. Одан түскен қаражат елордадағы паратриатлон спортын дамытуға жұмсалады. Біз бұқаралық спортқа ерекше мән береміз. Ол үшін апта сайын түрлі спорттық шаралар ұйымдастырылады. Солардың бірі – осы жылдың жазында жүгіруден ауқымды марафон өткізу» деді Нұр-Сұлтан қаласының Дене шынықтыру және спорт басқармасы басшысының міндетін атқарушы Самат Жылқыбаев.
Оның айтуынша, қалада бұқаралық спортқа арнап жыл сайын түрлі деңгейде 300-ден астам спорттық іс-шара ұйымдастырылады. Жыл сайын елордалықтар арасында салауатты өмір салтын ұстанатындар мен спортпен айналысатындар саны артып келеді.
Баян Асылбекова