Қызмет аясы кеңейе түсті
Әлемдік өркениетке жетудің бір жолы – ақпараттық технологияның ағымынан қалмай ілесіп отыру. Дамыған мемлекеттерде қағазбастылық ұғымы жоқ.
Ондағы қызметтердің барлығы дерлік электрондық жүйеге көшкен. Елордада қолға алынған электронды әкімдік жобасы да уақытты үнемдеудің, қағазбастылықтан құтылудың және мемлекеттік қызметтер деңгейін бағалаудың тиімді тәсілі.
Е-әкімдік жобасы іске қосылғалы қала тұрғындары қажетті мәліметтерді дер кезінде алып, уақытын әлдеқайда үнемдегені анық. Елорда әкімдігі биылғы қаңтар айынан қыркүйекке дейін 1 255 197 мемлекеттік қызмет көрсетсе, оның 34 369-ы халыққа қызмет көрсету орталықтары арқылы, ал, 22500-і электронды нұсқада көрсетілген.
Осы жылдан бастап Мемлекеттік қызметтердің тізіліміне өзгерістер мен толықтырулар енгізілгені белгілі. Бұл тізімге 647 мемлекеттік қызмет кірген. Соның 118-і – жергілікті әкімдіктің еншісінде.
Бүгінде Астана қаласы бойынша 19 мемлекеттік қызмет электронды нұсқаға көшкен. Олардың барлығы да тұрғындарға аса қажетті, жоғары сұранысқа ие.
Былтыр «Электронды Үкіметтің» веб-порталы арқылы 1 258 хабарлама келіп түссе, ведомстволық порталға өтініш жіберген тұрғындар саны – 7 839.
Қымбат ТОҚТАМҰРАТ