ҚЫЗМЕТТЕ «КӨКЕСІЗ» ӨСУ МҮМКІН БЕ?
Әлихан БӘЙМЕНОВ,
ҚР Мемлекеттік қызмет істері жөніндегі агенттіктің төрағасы:
– Қоғамда қызметке туысын тарту «дәстүрі» әлі де кездеседі. Мұндай дәстүрдің толығымен жойылатындығына мен сенемін. Өйткені, қазіргі басшылар өз қарамағында білікті кадрлардың болғанын қалайды.
Мемлекет басшысы «командалық көшу» деп аталатын тәжірибені тоқтату, конкурстан тыс ауысу арқылы кадрлар тағайындауды қысқарту жөнінде бірнеше тапсырмалар берген. Жаңадан ұсынылып отырған «Қазақстан Республикасының кейбір заңнамалық актілеріне мемлекеттік қызмет мәселелері бойынша өзгерістер мен толықтырулар енгізу туралы» заң жобасында осыған байланысты бірнеше мәселе көзделіп отыр. Заң жобасының басты мақсаты – мемлекеттік қызметке ең лайықты азаматтарды іріктеу арқылы қабылдап, лауазымы жоғарылағанда олардың абыройын, біліктілігін, еңбегін ескеретін жүйені қалыптастыру. Сонымен қатар, бұл заң жобасы «Қазақстан-2030» стратегиялық бағдарламасындағы «мемлекеттік қызмет ұлтқа қызмет ету керек» деген сөздің синонимі болуы тиіс.
Заң жобасында мемлекеттік қызметке іріктеудің жариялылығы мен әділдігін орнатуға бағытталған шаралар қамтылды. Ол кезде тестілеу мемлекеттік органдардағы конкурстық іріктеуден тыс тәуелсіз өткізілетін болады. Тестілеуде алған бағасына қарай азаматтарға конкурсқа қатысу құқын беретін сертификат тапсырылады.
Ильяс ҚОЖАБЕКОВ,
Ғылыми сараптама және талдау институтының үйлестірушісі, құқық магистрі:
– Бүгінгі күні кез келген жастың ешқандай «әке-көкесінсіз» өсуіне мүмкіндігі бар. Бірақ, ол үшін алдымен іскер, өз саласының нағыз маманы болуы шарт. Бірақ, «көкесіз» өсудің бір ескерер тұсы, ол қажырлы еңбекті, шыдамдылықты, сосын ұзақ уақытты талап етуі мүмкін, кей кездері.
Бірақ, қанымызға сіңіп қалған әдет болса керек, қолайлы қызметке жайғасу үшін қашан да «көке» іздейтін әдетіміз бар ғой біздің.