РӘМІЗДЕР РЕГЛАМЕНТІ ОЙЫНШЫҚ ЕМЕС
Кеше Астана қаласының әкімі жанындағы Қазақстан Республикасы Мемлекеттік рәміздері бойынша комиссияның кезекті отырысы өтті. Онда қала аумағында орналасқан мекемелердегі мемлекеттік рәміздердің регламентке сай орнату, талабының сақталуына байланысты аудан әкімдері орынбасарларының есептері тыңдалды.
Жыл басынан бері 201 мекеме мен ұйымдар тексеріліп, оның 153-інде рәміздерді қолдануда қателіктер жіберілгені анықталды. Яғни, ұлттық стандартқа сай келмейді, ту тозып жыртылған немесе арнайы стендтерде рәміздердің заңда көрсетілген тәртіпке сай орналасуына мән берілмеген. Ғимараттарға ілінген рәміздерге арнайы жарықтың түсірілмеуі, әсіресе, түнгі уақытта көзге қораш болып тұруы да талапқа қайшы. Осы орайда қалалық Ішкі саясат басқармасы түрлі мекемелер мен ұйымдардың өкілдеріне семинар өткізіп, түсіндіру жұмыстарын жүргізген.
Мемлекеттік рәміздердің регламентке сай орнатылуы жайында Кеңес төрайымы Аида Балаева ескертулер жасады. «Халықтың көзі қырағы, көп жағдайда қала тұрғындарының немқұрайлы қарамайтыны қуантады. Тудың жыртылып немесе боран жұлып әкеткенін көбіне қарапайым қала тұрғындары байқап жатады. Бұл сол себепті де халықпен нәтижелі жұмыс істеуді жалғастырып, талаптың сақталуына мүдделі болуымыз керек» деді ол жиынды қорытындылай отырып.
Айгүл УАЙСОВА