«25 қазан — Республика күні» Ұлттық мерекесі елімізде кең көлемде тойланып өтті, деп хабарлайды www.astana-akshamy.kz/
Соның ішінде Астана қаласында да көптеген іс-шаралар өтті:
Елордалық Триатлон саябағында мерекелік отшашу атылды. Отшашуды тамашалауға 10 мыңнан астам адам келді. 4 минут ішінде аспанға биіктігі 30-дан 250 метрге дейін 2500 отшашу ұшырылды. Ұзындығы 150 метрді құрады.
Отшашу жеке демеушілік қаражат есебінен ұйымдастырылды.
Айта кету керек, елорда тұрғындары мен қонақтары үшін айтулы мерекеге орай 100-ден астам түрлі форматтағы іс-шаралар (мәдени-бұқаралық, білім беру, спорттық және әлеуметтік іс-шаралар, соның ішінде мерекелік концерттер, көрмелер, дөңгелек үстелдер, ұлттық спорт түрлері бойынша турнирлер және т.б.) ұйымдастырылды.
Бес ауданның барлығында да концерттік бағдарламалар өтті.
Республика күні сағат 14:00-ден бастап шығармашылық ұжымдар мен орындаушылардың қатысуымен концерттік бағдарламалар қойылды.
Алматы ауданындағы «Интернациональный» тұрғын алабында танымал қазақстандық композицияларды орындаған «Жастар» театрының әртістері өнер көрсетті.
Байқоңыр ауданы «Өндіріс” тұрғын алабындағы алаңда Қуыршақ театрының концерттік бағдарламасы ұйымдастырылды, оның кейіпкерлері халық ертегілері мен сүйікті мультфильмдерінің кейіпкерлері болды.
Есіл ауданындағы «Бәйтерек» монументінің алдындағы алаңда көрермен үшін Е. Рахмадиев атындағы Мемлекеттік академиялық филармониясы мен Елордалық цирк әртістері өнер көрсетті. Цирк әртістері түрлі-түсті акробатикалық трюктерді, жонглерлік және фокустарды көрсетті.
Сарыарқа ауданындағы қалалық алаңда «Жошы» этно-фольклорлық ансамблі өнер көрсетіп, халық аспаптарының сүйемелдеуімен қазақ фольклорының үздік үлгілерін ұсынды.
Нұра ауданындағы Орталық саябақ аумағында «Наз» мемлекеттік би театрының әртістері көрермен алдында заманауи және дәстүрлі би нөмірлерінің бағдарламасымен өнер көрсетті.
Іс-шаралар орталық алаңдар мен ірі нысандарда, сондай-ақ тұрғын алаптардың аумақтарында, білім беру ұйымдарында және тағы да басқа орындарда өткізілді.
Сонымен қатар мереке аясында түрлі саладағы еңбек сіңірген қызметкерлер, еңбек ардагерлері, батылдық танытқан қазақстандықтар және т.б. тұлғалар марапатталды. Сондай-ақ халықтың әлеуметтік осал топтарына 1 мыңнан астам азық-түлік себеті таратылды.
Республика күніне орай күрделі жөндеуден өткен аулалар салтанатты түрде ашылды.
Сарыарқа ауданында мына мекенжайлар бойынша күрделі жөндеуден өткен аулалар салтанатты түрде ашылды. Олар Ш.Қосшығұлұлы көшесі, 17 және 19 мекенжайында орналасқан.
Дәстүр бойынша жаңартылған балалар алаңы әртүрлі жас топтарына арналған заманауи ойын алаңдарымен жабдықталған. Сонымен қатар, тұрғындардың өтініші бойынша мұнда қауіпсіз тартан мен жасанды жабын, сондай-ақ спорт алаңдары мен орындықтары бар демалыс орындары орнатылды, бұл әр адамға белсенді демалыс және уақытты пайдалы өткізуге мүмкіндік береді.
«Енді балаларыммен бірге олардың қауіпсіз және заманауи алаңдарда ойнайтынын біліп, аулаға алаңдамай шығатын болдық. Барлығы біздің тілегімізді ескере отырып жасалды. Біз екінші жыл қатысып, биыл жобаны жеңіп алдық», — дейді үй тұрғыны Зульфия Серғалиева.
Биыл Сарыарқа ауданында 66 аула күрделі жөндеуден өтті, бұл тұрғындардың белсенді қолдауы мен «Халық қатысатын бюджет – 2024» бағдарламасына қатысуының арқасында мүмкін болды. Жөнделген аулалардың жалпы санынан 43 мекенжай осы бағдарлама бойынша ретке келтірілді, ол қала тұрғындарының ұсыныстары мен бастамаларын есепке алуға бағытталған. Оның ішінде, тұрғын алаптардағы 15 аула барлық жастағы топтардың жайлы және қауіпсіз демалуына ықпал ететін жаңа заманауи алаңдар мен инфрақұрылымға ие болды.
Биыл Астанада барлығы 170 аула мен қоғамдық орын абаттандырылады. Жұмыс қаланың барлық ауданын, оның ішінде тұрғын үйлерді қамтиды. Жұмыстың басым бөлігі қазірдің өзінде аяқталды.
