Садақа, зекет жинауды автоматтандыру мен бақылау орнату идеясына қалай қарайсыз?
Марс Смағұлов,
ҚМДБ жанындағы «Зекет қорының» референты:
– Дін істері агенттігінің бұл ұсынысы дұрыс шығар, бірақ мешіттердегі тиын-тебен тастайтын жәшіктерді жойып, түгелдей автоматтандыру көпшіліктен қолдау таба қоюы екіталай. Өйткені, садақа Аллаһ разылығы үшін беріледі. Екінші жағынан, қолайсыздық туғызуы мүмкін. Мысалы, сіз өлім-жітімге, ас бергенде, діни мейрамдарға жайылған дастарқанға молда шақырсаңыз, оған разылық ретінде берілетін азын-аулақ ақшаңызды аяқтай барып автомат арқылы төлеуге дайынсыз ба? Ал мал-мүлкінің, дәулетінің қырықтан бір бөлігін беруді міндеттейтін зекетке ондай жүйе енгізіп жатса, жөн бөлек. Ол қызметті осыдан бір-екі жыл бұрын ҚМДБ жанынан құрылған «Зекет» қоры жүзеге асыра бастады. Qiwi пост-терминалдарына төлеп немесе байланыс операторларындағы қысқа нөмірлерге смс жіберу, «Центркредит» банкінен ашылған арнайы есепшотқа аудару арқылы зекет беруге болады. Осы күнге дейін Зекет қорына елу екі миллион алты жүз сексен екі мың бір жүз қырық үш теңге жинақталды. Бұл – халықтың діни сауатын ашуға, Ислам насихатын көркейтуге, имам-молдалардың әлеуметтік мәселесін шешуге, т.б. сауапты істер мен қайырымдылық шараларға жұмсалады. Мысалы, жинақталған қордың есебінен өзін-өзі қаражатпен қамтамасыз ете алмайтын 144 ауыл имамына биыл 1 қаңтардан бастап 20 мың теңге мөлшерінде жалақы бере бастадық.
Сұлтанәлі Балғабаев,
Дүниежүзі қазақтары қауымдастығы төрағасының орынбасары:
– Дінді бетімен жібермей, белгілі бір бақылау, тәртіп болуы керек дегенді мен баяғыдан қолдаймын. Өйткені, ең күшті идеология – осы дін. Қайрат Лама Шариф Дін істері агенттігіне келгелі бері осындай игі шаралар қолға алына бастады. Сондықтан садақа, зекетті банкомат арқылы жинай ма, бақылау орната ма – ол жағы мұсылман қауымы үшін аса маңызды болмауы керек. Дін төңірегінде жүз мәселе болса, бұл – соның 98-інші немесе 99-ыншы мәселелерінің бірі.
Жангелді Сәрсенов,
«Аяла» қайырымдылық қорының вице-президенті:
– Егер Дін істері агенттігі ондай шараны қолға алып жатса, мешітке жиналатын қайыр-садақаның есебіне белгілі бір деңгейде жариялылық жетіспейді деген сөз. Халық тұрмысы мүшкілдерге, мүгедек-міскендерге, ауыр науқастарға көмек болсын деп ақша бергесін, оның қайда, қалай жұмсалып жатқанын білуі керек деп есептеймін. Мысалы, біздің қайырымдылық қордың жер-жердегі жәшіктеріне түскен қаржыны санағанда, актіге екі тараптың қолы қойылады. Бірі – біздікі, екіншісі – сол жәшік орнатылған жердің иесінің қолы. Ал жиналған қаржының қандай мақсатқа жұмсалғанын сайтымызда көрсетіп отырамыз.
Сапар Мұстафин,
«Қазақстан қажылары қауымдастығы» Астана қалалық филиалының төрағасы:
– Біреу тақ сан деп ырымдап береді, біреу қалтасындағы барын салады. Жағдайы жеткендер көбірек қайыр-садақа жасайды. Оның бәрін қалайша автоматтандыруға болады? «Жасырын берілген садақа Аллаһтың ашуын сөндіреді» дейді. Аллаһ разылығы үшін жасалған әрбір жақсылық – садақа. Ендеше, қалай жақсы амалды автоматтандыруымыз керек. Кейін мен мынанша садақа беріп едім деп түбіртегін санап жүру үшін бе? Меніңше, бұл аса дұрыс қарекет емес.
Әділбек ЖАПАҚ
