Сахнаның құдіретіне, қасиетіне бас ию керек
Нұрғали НҮСІПЖАНОВ, ҚР Халық әртісі:
– Өнердегі көп інілеріңіз сізді аға тұтады. Өзіңіз өнер жолына ден қойған жылдары кімдер қол ұшын беріп еді?
Сәбира, мұғалім
– Ол басқа заман. Соғыстан кейінгі жылдар. Үшбу хаттар көп келіп жататын. Үлкен кісілер көп болды. Біз адамдардың ықыласы, парасаты – ең бағалы қасиеті екенін сезініп өстік. Аллаға шүкір, жолым болды. Талай өнегелі жандардың қолына су құйып, қызмет еттік. Қанабек Байсейітов, Құрманбек Жандарбеков, Кенен Әзірбаев ағаларымыздың ақылын тыңдап өстім. Ол кісілерді пір тұттым. Ауылдың қаратабан балалары жоғары оқу орнын бітіріп шыққаннан кейін сол кісілердің ақыл-кеңесімен жетілдік. Асқар Тоқпановпен сіз-біз десіп өттік. Ахмет Жұбановтың ақыл-парасатын тыңдадық. Ол кісіден дәріс алдық. Қала бойынша түрлі үлкен іс-шараларда дәріс оқуға шақыратын. Мұқан Төлебаев ағамыздың да көзін көрдім.
– Сахнада бойыңызды тік ұстайсыз. 70-тің жотасына шыққан ақсақал деу қиын. Өзіңізді қалай күтесіз, аға?
Көркем, бухгалтер
– Сонша қатты күтінбеймін. Жаратқанның бергені осы. Құрдастарым, құда-жегжатымның арасында да осындай әңгіме болады. Сол кезде қалжыңдап, «Үйдегі кемпірім тамаққа тойғызады, сосын тоңазытқышқа салып қояды. Мені солай сақтайды. Таңертең тоңазытқыштан алып, шай береді» деймін. Әрине, мұның бәрі қалжың ғой. Ең бастысы, сахнаның құдіретіне, қасиетіне бас ию керек. Ең асыл дүниенің бәрі сахнаға шығады. Тіпті, ел президенттері, патшалары сахнаға шығып сәлем береді.
– Кейбір әншілер өздерінің өнер жолы жайында сыр шертетін кітап шығарып жатыр. Бұған қалай қарайсыз?
Айжан, медбике
– Өте дұрыс. Менің де «Өз елім» деген естелік кітабым жарық көрген. Қазір де ойда жүрген біраз нәрселер бар. Ол бір кітапқа тати ма, татымай ма, оқырман бағалай жатар. Бүгін-ертең кірісіп жатқаным жоқ. Оған қоса, жастарға оқулық болатындай қып әндерді топтастырып, ретке келтірсем бе деймін. Бос уақытымда осымен айналысамын.
– Аға, сізді туған жеріңізге бақ өсіру ісін қолға алыпты деп естідік…
Арман, кәсіпкер
– Әлі бітпедім. Бұл жағынан ұяттымын. Біраз шаруа тоқтап тұр. 2000 жылы Елбасы Астананың маңайына ағаш отырғыза бастағанда, мен де туған ауылым аңғал-саңғалдау болмасын деп осы игі істі қолға алдым. Өйткені, бақ – болашаққа қалатын мұра. Жұмыс су тапшылығынан тоқтап тұр. Бір жағынан, облыс, аудан басшыларына өкпем қара қазандай. Өздеріне жүктелген шаруаларын кешіктіріп жатыр. Шағын ауылда ауыз су мәселесі шешімін таппай тұр. Тау суы күн ысығанда жерге сіңіп кетеді. Ауылға келген суды бұрып алсам, маған ешкім қой демейді, тек сол жерде тұратын халқымның тамшы суына ортақ болуға намысым жібермейді. Талай басшыларға хат жазып, ауыз су мәселесін шешуді өтіндім. Көп те қаражат кетпейді. Төрт-бес шақырым жерге жететін құбыр орнатса, болғаны. Жалқаулық, немқұрайдылық, марғаулық басым. Елге, жерге деген құрмет жоқ. Адамның адамдық қасиетін бағаламау – бомбадан да қауіпті. Бұл менің жеке басым емес, ел үшін істелетін шаруа ғой.
– Аға, неше жасыңыздан ән айтып келесіз?
Шынар, студент
– Бала күнгі арманым суретші болу еді. Мектепке бармай тұрып-ақ сурет салуға әуес болдым. Жоғары сыныпқа көшкенде ғана әнге қызығушылығым арта бастады. Әке-шешем ән салмағанмен, өнерпаздарды құрмет тұтып, ерекше ықыласпен тыңдайтын. Өнерді сүйіп өсуге, құрметтеуге ата-анамнан көрген тәрбием әсер етті деп ойлаймын.
– Ізіңізді қуып келе жатқан жастарға көңіліңіз тола ма?
Игілік, қала тұрғыны
– Бізде талантты жастар көп. Олардың мүмкіншілігі мол. Ә дегеннен барлығы бабына келе бермейді. Өнер адамы елмен араласуы керек. Елдің сын-пікіріне құлақ асуы керек. Санасында саралау керек. Сонда ғана таланты ұштала береді.
– Қарапайымдылығынан айнымайтын қазақы, қоңыр болмысыңызды ерекше құрметтеймін. Атақ-даңқыңызға қарамастан осылай қалыптасуыңызға не әсер етті?
Перизат, зейнеткер
– Құлағымнан «Ұлық болсаң, кішік бол», «Халқыңнан, еліңнен биік болма», «Суды, жерді былғама», «Ешкімге қиянат жасама» деген сөздер кетпейді. Қоразбаевша айтсақ, бұл – «қара шалдардың», ауыл ақсақалдары мектебінің тәрбиесі. Сол кісілердің айтқанындай, кісінің жөнсіз алдын кесіп өтпеу, үлкенге құрмет, кішіге ізет көрсету, тіпті, сөйлеп отырған адамның сөзін бөлмеу секілді жай ғана қағидалардың өзі бізге үлкен өмірлік сабақ болды. Қарт адамды тамыр-таныстығына, ұлтына қарамай сыйлау, кемтар жандарға қол ұшын беру санамызға әбден сіңіп қалды. Бізді солай тәрбиеледі, солай қалыптастық.
– «Өнер қырандары» әзіл-сықақ театрының сізге пародия жасағанын көрген едім. Қалай қабылдадыңыз?
Толғанай, мұғалім
– (Күлді). Пародия жасамас бұрын «Өнер қырандарының» жігіттері рұқсат сұрады. Рұқсатымды бердім. «Істейтін қызметтерің, нан тауып отырған жұмыстарың сол ғой, жасаңдар» дедім. Әрі осы пародия арқылы өзімді сырттан қарауға мүмкіндік алдым. Негізі, адам өзіне бір уақ сырт көзбен қарап қойғаны дұрыс.
– Әншілік өнердегі кемшіліктерді айтып бере аласыз ба?
Зина, оқырман
– Кемшілік болып жатыр. Бірақ ол түзелмейді емес. Білместіктен, асығыстықтың кесірінен орын алып отырған кемшілік. Қазір көптеген өнер адамдары қамқорлықтан тыс қалып жатыр. Үйсіз-күйсіз, жұмыссыз жүрген жастар көбейіп кетті. Осы жағы қиын. Біз соларға жолдарын дұрыс таңдауына қолғабыс жасауымыз керек. Мемлекет тарапынан қамқорлық болуы тиіс. Қамқорлықты тиісті деңгейде жасай алсақ, оларда да жауапкершілік сезімі пайда болады.
– Астана жұртшылығына қандай тілек айтасыз?
Самал, студент
– Астана – бүкіл мемлекетіміздің айнасы. Астананың үйлері сәнді, көшелері түзу болып қана қоймай, адамдары да әсем, рухани бай, ішкі мәдениеті жоғары, нағыз патриоттар, қайраткерлер болу керек.
Еркежан СӘТІМБЕК