Кеше Дүниежүзілік балалар күніне орай Астанадағы №1 Мамандандырылған балалар үйінің бас дәрігері Гүлнар Құлышева сал ауруына шалдыққан бүлдіршіндерді оңалтуды көздейтін жаңа жобаны таныстырды.
«Дені сау бала – ұлт болашағы» деп аталатын бағдарламада тірек-қозғалтқыш аппараттары зақымданған балаларды ерте жастан сауықтырып, психикалық, физикалық тұрғыдан дер кезінде дамуына көмектесу шаралары қарастырылған.
– Дәрігерлеріміз осы әдістеме бойынша балалармен жұмыс істегелі екі жылдан асты. Сапалы құрал-жабдық сатып алғалы әрі сырқат балаларды ерте жастан кешендік күтіп-баптап, оқытудың арқасында бақылаудағы он алты баланың он шақтысы сауыға бастады. Нақтылай айтсақ, аурудың клиникалық ауыртпалықтары – бұлшықет спастикасы мен гиперкинезасы төмендеп, мінез-құлықтарында оң өзгеріс байқалды, бұрынғыдай тілдері күрмелмейтін болды. Тағы бір қуанарлығы, осындай диагноз қойылған үш баланы мейірімді жандар асырап алды, – дейді Гүлнар Ережеқызы.
Әйгерім БАЛҒАБАЕВА
