Астана қаласы әкімдігінің Музыкалық жас көрермен театрының жетекші актрисасы, Қазақстанның еңбек сіңірген қайраткері Самал Еслямова Ресейдің «Ақ піл-2024» ұлттық сыйлығының лауреаты атанды.
Аталмыш сыйлықты РФ киносыншылары, киножурналистері және кинотанушылары тағайындаған. Канн кинофестиваліндегі жеңісі арқылы танылған Самал Еслямова «Әке сенбі күні қайтыс болды» фильміндегі рөлі үшін «Екінші пландағы үздік актриса» аталымында топ жарды.
Бұл кинотуынды режиссері – Ресейге қоныс аударған қазақ қызы, Қарағанды мемлекеттік университеті филология факультетінің түлегі Зака Абдрахманова. Ол Марина Разбежкина мен Михаил Угаровтың деректі фильм мен театр мектебін бітірді. Сонда оқи жүріп, «Жаным» атты автобиографиялық фильмін түсірді. Режиссер, сценарист, оператор ретінде «Мерейтойлық жыл», «Мандариндер», «Қыздар», «Гулаг балалары» секілді фильмдердің түсіріліміне қатысты.
Бұған дейін деректі фильмдерді түсірумен айналысқан Заканың «Әке сенбі күні қайтыс болды» фильмі – алғашқы көркем фильмі. Бұл туынды «Ақ піл-2024» ұлттық сыйлығында «Үздік толықметражды дебют» аталымын да иеленді. Қазақстанда түсірілген аталмыш кинотуындыға Самал Еслямова арнайы шақырылды. Сонымен қатар фильмде бірқатар қазақстандық әртістер ойнайды. Атап айтқанда, Азат Сейтметов, Данагүл Темірсұлтанова, Венера Нигматулина, Лаура Тұрсынханова, т. б. көрінеді.
Дайындаған Аманғали ҚАЛЖАНОВ
