САПАСЫЗ ТАУАРҒА ЖОЛ ЖАБЫЛАДЫ
Тұтынушылардың құқығын қорғау агенттігі жұмысының негізгі алты бағыты айқындалды. Ол жөнінде Орталық коммуникациялар қызметінің брифингі барысында агенттік төрағасы Болатбек Қуандықов мәлімдеді.
Оның айтуынша, ең алдымен тұтынушылардың құқығын қорғауға бағытталған жаңа модель әзірленді. Салаға қатысты заңда шикіліктер анықталғандықтан, агенттік мамандары жаңа заңды дайындауға кіріскен. «Қазірде еліміздегі 172 қоғамдық бірлестіктен 50-і ғана нақты жұмыс істейді. Сондықтан жаңа заңда мемлекеттік қолдау тетіктері де қарастырылып отыр» деді агенттік төрағасы.
Тұтынушылардың шағымдары негізінен тұрғын үй-коммуналдық шаруашылық, қоғамдық көлік, құрылыс салаларының жұмысына қатысты түсіп жататын көрінеді. Жаңа заңда осының бәрі реттелмек.
Сонымен бірге, эпидемиологиялық қадағалау жүйесі де жетілдірілетін болады. Оның ішінде санитариялық талаптарды қайта қарау көзделуде. Болатбек Баянұлының сөзінше, жақында Астанадағы бір мектепте орын алған жағдай соны көрсетіп отыр. Рұқсат беру құжаттар санын қысқарту да жоспарлануда.
Өнімдердің қауіпсіздігіне айрықша назар бөлінбек. Алдымен белгілі бір өнім алдымен зертханалық зерттеуден өткізіледі. Оның зияны анықталмаса ғана саудаға шығарылады. Қазірдің өзінде, мәселен, наурыз айында бірқатар азық-түлік тексеріліп, елімізге Ресей және Беларусьтен келетін құс еті мен Украинада өндірілетін ірімшік өнімдерін кіргізуге тыйым салынған.
Сонымен бірге, агенттік бірыңғай ақпараттық жүйе құрмақшы. Арнайы порталда сапасыз тауарлар атауы орналастырып, тұтынушы нені алу, нені алмау керектігінен хабар алады.
Аманғали ШМИТҰЛЫ