«Сарра» драмасы – сахнада
Қ.Қуанышбаев атындағы мемлекеттік академиялық Қазақ музыкалық драма театры сахнасында мамырдың 17-18 күндері кезекті премьера өтеді. Бұл жолы қаллекиліктер ҚР еңбек сіңірген қайраткері, жазушы-драматург, халықаралық «Алаш» әдеби сыйлығының лауреаты Роза Мұқанованың «Сарра» драмасын ұсынады.
Қойылымды Астанаға арнайы шақыртылған ҚР еңбек сіңірген қайраткері, Ақтау қалалық Н.Жантөрин атындағы Қазақ музыкалық драма театрының көркемдік жетекшісі және режиссері Гүлсина Мерғалиева сахналады.
Драманың бас кейіпкері Сарраның бейнесіне келсек, ол – ұрпақ жалғастығы үшін өзінің атақ-даңқын да, махаббатын да құрбан еткен әйел. Қойылымда Сарраның осы жолдағы жан азабы мен әйелдік қызғаныш өртіне түскен дерті суреттеледі.
«Біз – аз халықпыз, бізге көбею керек. Бабалардан қалған кең-байтақ жерге ешкім көз алартпау үшін өз жерімізге өз ұрпағымыз ие болуы қажет». Бас кейіпкер осы сөздерді ұстанады.
Спектакльде «Сарраны» үш актриса – ҚР еңбек сіңірген қайраткері Ләйла Бекназар-Ханинга, Қазақстан Жастар Одағы сыйлығының лау-реаты Майра Омар және Сая Тоқманғалиева сомдайды. Ажар бейнесінде Айнұр Бермұхамбетова, Гауһар Жүсіпова, Алтынгүл Серкебаева көрінеді.
Аманғали ҚАЛЖАНОВ