Кеше Сарыарқа ауданы әкімдігінің ұйымдастыруымен №20 орта мектеп және «Жастар» театрының аумақтарында Наурыз мерекесі тойланды.
Бүгін №49 орта мектеп аумағында және 22 наурыз күні «Наз» театрының алдындағы алаңда Ұлыстың ұлы күні мерекесін тойлау жалғаспақ. Тұрғын алаптары халқына арналған мерекелік концертті «Наз» театры және аталған мектепдің өнерпаздары көрсетеді. Концерттен бөлек түрлі спорттық сайыстар мен ойындар ұйымдастырылады. Жеңімпаздарды қалалық мәслихат депутаттары марапаттайды. Қала кәсіпкерлері тойшыл қауымға наурыз көже, тағы басқа ұлттық тағамдарды ұсынады.
Сондай-ақ, Сарыарқа ауданының әкімдігі Астана қаласы Мәдениет басқармасы және «Астана ЭКСПО-2017» ұлттық компаниясымен бірге осы күндері қалалық алаңда өтетін мерекелік шараларға атсалысады. Ол үшін Бейбітшілік көшесі жағынан 8 киіз үй тігіліп, қолданбалы өнер көрмесі ұйымдастырылады. Сонымен бірге, қала мекемелері ұлттық салт-дәстүрлерді көрсетеді.
Атап айтсақ, «Астана» медициналық университеті «Тұсаукесерді», Энергетика басқармасы «Бата беруді», Табиғи ресурстар басқармасы «Наурыз айтысты», «Астана Тазалық» ЖШС «Беташарды», «№3 автобус паркі» ЖШС «Ат қоюды», Сарыарқа ауданындағы «Парасат» ПИК қауымдастығы «Ұлттық ойындарды», Білім басқармасы «Кешірім дәстүрін» және «Астана – жаңа қала» ЖШС «Көрісу-амандасуды» дайындап отыр.
Бұлардан басқа ҚР Қорғаныс министрлігінің Орталық ансамблі концерттік бағдарламаны ұсынады.
Аманғали ҚАЛЖАНОВ
