САРЫАРҚАЛЫҚТАР НАУРЫЗДЫ ОЙДАҒЫДАЙ АТАП ӨТТІ
Ғасырлар бойы атадан балаға мирас болып келе жатқан дәстүрлі Наурыз мейрамын биыл Астана қаласы Сарыарқа ауданының әкімдігі де ойдағыдай атап өтті.
Мерекеде қала әкімдігі алдындағы алаңда елорда тұрғындары мен қонақтарына «Ұлыстың ұлы күні» атты мерекелік іс-шара ұйымдастырылды. Бағдарламаға театрландырылған қойылым, байқаулар, спорттық және ұлттық ойындар енгізіліп, келушілер безендірілген киіз үйлер көрмесі мен салт-дәстүрлер көрінісін тамашалады. Көпшілік наурыз көже, палау, бауырсақ, тағы басқа тағамдардан дәм татты.
Жиналған қауымды Астана қаласы мәслихатының хатшысы Сансызбай Есілов пен аудан әкімі Ермағанбет Бөлекпаев құттықтады.
Т. Бигелдинов көшесі жағынан алаңға кіре беріске екі алтыбақан орнатылды.
Алаңдағы сахнада Астана қаласы Мемлекеттік филармониясының әртістері өнер көрсетіп, Жастар театры ұйымдастырған «Көш керуен» атты қойылым ұсынылды.
Алаңда Бейбітшілік көшесі жағынан 8 киіз үй тігіліп, онда ұлттық салт-дәстүрлер көпшіліктің назарына тартылды. Сонымен қатар, аталған мерекеде «Сарыарқа ауданының ең үздік киіз үйі» байқауының қорытындысы жарияланды.
Нәтижесінде бірінші орын – Астана медицина университетіне, екінші орын Астана қаласы Қаржы басқармасына тисе, үшінші орынды «Астана Тазалық» ЖШС иеленді. Барлық жеңімпаздар бағалы сыйлықтармен және Сарыарқа ауданы әкімінің дипломымен марапатталды.
Сағи ОРАЛ