Сейтен-Тайжан оқиғасы
Сарыарқа қазақтары Сейтен-Тайжан деп қосарлап Кенесары заманына қатысты бiр ауыр әңгiмелердi айтады. Бұл әңгiмеде айтылатын Сейтен мен Тайжан – ағайынды азаматтар. Олардың әкесi Азынабай деген кiсi ХIХ ғасырдың 20-шы жылдары 17 мың жылқы айдаған атақты бай болған екен дейдi қариялар. Азынабайдың қыстауы Баянаула жерi болса, жаз жайлауы – Есiлдiң бойы. Осы себептерге байланысты Азынабай тұқымы Қоңырқұлжа Құдаймендiұлының Ақмолада округ ашып, дуан салмақ болғанына қарсы шыққан. Өздерiнiң орысқа күшi келмейтiн болған соң Кенесары көтерiлiсiне қатысып, қолдап отырған. Кейiннен осы кiнәлары үшiн Тайжан Ақмолада атылды да, Сейтен Сiбiрге жер аударылды.
ХIХ ғасырдың 20-жылдары Ресейдiң қазақ жерiнiң солтүстiк бөлiгiне ендеп енуi, Жайық пен Ертiс бойынан қазақты оңтүстiкке қарай ығыстыруы, әр жерде дуан орталықтарының салынуы көшпелi мал шаруашылығына аса қатты соққы болып тидi. Осыған байланысты қазақ қолындағы мыңғырған мал күрт азайып, жоқшылық көбейе түстi. XIX ғасырдың ортасында қазақ тарихы мен этнографиясына қатысты Арқа жерiнде тамаша зерттеулер жүргiзген В.В.Радлов «нельзя отрицать того, что с установлением порядка благосостояние народа уменьшилось. Внутренняя орда возле Семипалатинска… почти разорена» деп жазады.
Шоқан Уәлиханов пен Мұса Шормановтың Батыс Сiбiр генерал-губернаторының атына жазған арызында қазақтың «Жаңа низамға», яғни 1822-1824 жылдардағы реформаларға дейiнгi заманда әлдi-бай өмiр сүргенi айтылады: «В старые времена, во время опустошительных войн и вседневной баранты, казахи были богаче, чем теперь, и повсеместные упадки случались редко… Что сибирские казахи были богаче до основания приказов (дуандардың ашылуы туралы – Ж.А.) – это факт, неподверженный ни малейшему сомнению: стоит только посмотреть на число скота, который был пригоняем на Оренбургскую и Сибирскую линии в конце прошлого и в начале нынешнего столетия, и на официальные исчисления 20-х и 30-х годов (XIX ғ.-Ж.А.). В эту последнюю эпоху было немало казахов, имевших 10- тысячные табуны лошадей».
Бұл жерде Шоқан мен Мұсаның айтып отырғаны, әрине, қазақтың даңқын шығарған Сапақ, Алдажұман, Азынабай және Бапақ сияқты Сарыарқада теңдесi жоқ атақты жылқылы байлар. Қазақ арасында – «Бай болсаң Бапақтай бол, Азынабай, Сапақтай бол» делiнетiн осылар. Өмiр сүрген уақыты – XIX ғасырдың бiрiншi жартысы. Азынабай Ақмырзаұлының 1838 жылы қайтыс болып, сүйегiн баласы Сейтен Әзiретi сұлтанға апарып қойғаны архив деректерiнен белгiлi.
Жоғарыда аты аталған байлардың бәрi де XIX ғасырдың 30-жылдары жұтады. Қайырусыз жылқы баққан қалың елдi орыс отаршылдығына қарулы күреске шақырған Кенесары хан әуелi осы құт иелерiне сүйендi. Кенесары айтқан екен дейдi: «мен мақсатыма жету үшiн құдайдан Орта жүздi бер деп сұрадым, екiншi жаужүрек батырларды сұрадым, үшiншiден, Аққошқар мен Алдажұманды, Азынабайдың Сейтенi мен Тайжанын сұрадым. Құдай бұл тiлегiмдi бердi. Бұлардың жылқысы менiң әскерiме мiнетiн ат болды, iшетiн ас болды, – деп есептедiм. Сондықтан бұлар – менiң досым, мен – бұлардың досымын. Өздерiң бiлесiң, бұлар – Құдай еркелеткен адамдар. Құдай еркелеткен адамдарды мен де еркелетуiм керек, мен құдайдан үлкен емеспiн».
Қазақ шежiресiне сүйенсек, тағы да бiр деректердiң көзi табылады. Ол – Азынабай балаларының орыс отаршыл үкiметiне қарсы болуының себептерi және күрес тарихы.
XIX ғасырдың 30-жылдары қазақтың игi жақсылары екiге жарылды. Бiр жағы қайткен күнде де алмай қоймайды деп Ресейдiң ығына жығылса, екiншi тобы қалай болған күнде де қарсыласып, қазақтың тәуелсiздiгiн қорғап өлуге бел байлады. Осы соңғы топтың жуан ортасында Азынабай ұлдары Сейтен мен Тайжан болса, алдыңғы топтың iшiнде Шорман сияқты азаматтар болған. Бұл алақандай қаржас елiнiң iшiнде болған жарықшақ сол заманда бүкiл қазақ баласына тән ортақ құбылыс едi. Сонымен бiрге орысқа бодан болған ел iшiнде Ресейге жан-тәнiмен қызмет iстеген жандайшап белсендiлер де, сен тимесең мен тиме деп әлiптiң артын бағып отырғаны да аз болған жоқ.
Сейтен-Тайжан әңгiмесiн қариялар Қонырқұлжа сұлтанның шешесi Абыл ханымға ас берген уақыттан бастап айтады. Асты ың-шыңсыз өткiзу үшiн Қонырқұлжа осы маңның қазағының iшiнде алғаш рет Омбыдан он шақты казак-орыс әскерiн алдыртқан екен. Қазақтың ас беру рәсiмiнде мылтығы сорайып, орыс әскерiнiң жүргенiн Сейтен, Тайжан ұнатпай, қалың топта наразылық бiлдiрген. Тайжанның бiрiншi рет орыс қолына түсетiн себебi – осы. Кейiн Қоңырқұлжаның билеп отырған елi Алтай-Қарпықтың iрi билерi араласып, бұл жанжалды басқан. Қуандық – Сүйiндiк деген елдер шежiреде бiр-бiрiмен ағайынды саналады және қажет болса, төрелерге қарсы бiрiгiп те кетедi.
Ендi келiп екiншi оқиға таза шаруашылыққа байланысты дамиды. Оған себеп – Қоңырқұлжаның келiсiмiмен орыстың Сарыарқаның дәл ортасынан Ақмола бекiнiсiн сала бастауы. Саққұлақ шежiресiне құлақ түрелiк:
«Ақмола қорғанын салуға алғаш белгiленген орын Нұра өзенiнiң бойындағы Ақмола дейтiн моланың жаны болатын. Ол – қазiргi қала салынған Қараөткел деген жерден 25 шақырым жерде. (Қазiргi уақытта Тайтөбе деп аталады. – Ж. А.) Осы жерден қаланың орнын өлшеп, жаппай үйлер тұрғызып жатқан Қоңырқұлжа сұлтанның нөкерлерi бiраз адам болады. Iшiнде Қоңырқұлжаның үлкен баласы Бегалы төре бар. Сейтен, Тайжанның жайлауы бұдан көп алыс емес. Есiл өзенiнiң бойындағы Жалғызағаш деген жер едi. Тайжан қаршыға салып жүрiп, осында келедi. Жөнiн бiлген соң Бегалыға қарсылық бiлдiредi. Жерiн қызғанып: «Кетiңдер, қала салғызбаймын», – дейдi. Бегалы ызаланып, күш көрсетiп, ұруға айналған соң, Тайжан жылыстап кетiп қалады.
Сейтен, Тайжанның осы дүрбелеңге байланысты жиналған жасақ жiгiттерi болады. Әлгi ерегестен бiр күн өткен соң осы жасақты алып, Тайжан қала салынғалы жатқан жерге келедi. Бегалыны ұрып, саймандарын тартып алып, көлiкке әкелген бiр жүздей жылқысы бар екен, оны тағы айдап кетедi. «Бұл – өлтiрген қаршығамның құны» – деп, бақташыға айтып жiбередi (Тайжан жалғыз келген күнi төрелер қаршығасын өлтiрген болатын). Бұл оқиғадан көп ұзамай, қаланы екiншi орыннан салуға ұйғарып, Есiл өзенiнiң бойындағы Қараөткел деген жерге 1830 жылы Ақмола қорғанын салады. Аға сұлтан болып Қоңырқұлжа тағайындалады. Ендi оған алдымен Сейтен, Тайжаннан кек алу керек. Сонымен оларға ерген ауылдарды жазалау үшiн Бегалыны басшы қылып қырық қазақ-орыс жiбередi, мiне, Қаржастың Кенесары көтерiлiсiне қосылуына осы себеп болады».
Мәшһүр Жүсiп Көпейұлы жинақтаған қазақ шежiресi Кенесарының Ақмола маңын мекендеген Төменгi Алтайдың басшысы болған Аққошқар Сайдалыны, Сүйiн-Жарқынды ертiп алып, Өр Алтайы Алдажұман байға келiп оны ертiп алып, Орта жүзде Азынабай-Сапақ атанған Азынабайға келгенiн баяндайды: «орысқа қарап бағынып қойған Азынабай балалары: Тайжан қазы, Сейтен болыс едi. Болыстық, қазылықты керек қылған жоқ: Кенесарыға ерiп ауды. Алтай Алдажұман бай түйеге артқан жамбыларын көлге, суға төгiп кеткен. Қаржас та ауды, Орманшы да ауды. Баянаулада Боштай аға сұлтан-дуанбасы күнi солдат алдырып, казак-орыс алдырып, Айдабол, Күлiктi қойдай қамап, иiрiп, аудырмай алып қалды. Қоңырқұлжа Қараөткелге аға сұлтан-дуанбасы о да өз тiлiн алған қазақты, орысты арқа сүйеу, таяныш қылып, алып қалды. Ауған ел Шуға, Қаратауға барғанмен, малы жерсiнбей, бара жатқанда, жолшыбай қашып, алақыстай Құдайдың құтты күнi қашып, дамыл бермеген соң, Кенесары елдi өз еркiмен қайтармайтұғындығын бiлген соң, жаз шыға ел тау-таудың басынан өрт салып, өрттен қашқан кiсi болып, тұра-тұра көше жөнелген де, сол көшкен бойымен Арқаға қарай ауа жөнелген».
Орыстың ресми деректерiне қарағанда Сейтен мен Тайжанның Кенесары әскерiне қосылуы 1838 жылы көктемде. Бұл кезде Қаржас руының көсемi Шорман би қайтыс болған (ол 1837 ел жайлауда Ерейменде отырған кезде қайтыс болды), ел билiгi жиырмаға жаңа келген Мұсаға көшкен. Кенесарының өзi қалың әскермен келгендiктен, шегiнетiн жер жоқ Мұса бастап қалың қаржас елi түгелдей көтерiлiске қосылды. Қазақстанның орталық мемлекеттiк архивiндегi «дело по обвинению бия Баян-Аульского округа С.Азнабаева в участии восстании К.Касымова» деген құжатта Сейтен өзiнiң қаржасты бастап оңтүстiкке көшкенiн әкесi Азынабайдың өлiмiмен байланыстырады: «после смерти отца своего Азнабая, тем коего отвезли с 40 человек в Ташкентский город Азырет». Бұл оқиға да көшумен қатар болғаны рас. Азынабайдың 1838 жылы өлгенiн, оның сүйегiн балалары Әзiретке апарып қойғанын Сейтеннiң құлы Тiлеген Канатеев өзiнiң орысқа көрсеткен жауабында айтады. Сонымен қатар, оның жауабынан Сейтен мен Тайжанның 1838 жылы Ақмоланы шабуға тiкелей қатысқанын көремiз. Саққұлақ шежiресiнде «Келген бетте қол казармаға қарай бет қойып едi, алдынан бiр-екi кiсi оққа ұшып, жығылған соң, тайып шыға бердi. Сейтен, Тайжан екеуi қолына екi шитi мылтық ұстаған, екеуiнiң де белiнде шашақты ақ найза, астарында аузымен құс тiстеген семiзден қатырып тастаған екi боз ат. «Абылайлап» ұран салып шегiнген қолды қайта серпiп, казармаға айдады. Бiр кезде қол бет қойып, казармаға есiк пен төрдей жер қалды. Сол кезде тесiктен атқан мылтық дүрс етiп, қолдың алдына түсiп бастап жүрген Тайжанның атына оқ тиiп, мұрттай ұшты, қатардан 4-5 адам жығылды. Қол қайта серпiлдi. Тайжан бiреудiң атының құйрығынан ұстап, iлесiп, аман шығып кеттi» деп осы оқиға бүге-шiгесiне дейiн сипатталады.
Кенесарының Ақмолаға шабуылынан кейiн Ресей бiрден жазалау шараларына кiрiсiп кеттi. 1838 жылдың шiлде айының соңында жазған хабарында войсковой старшина Карбышев Сейтен мен Тайжан ауылдарын Жақсы-Қоң мен Қыпшақ өзендерiнен жоғары Ұлытауға қарай өрлеп келе жатқан жерiнен кездестiрдi. Осы жерде Сейтен мен Тайжанның шешелерi, әйелдерi, қыздары аманат есебiнде тұтқындалды. Қалған ел Баянаулаға қайтатын болды. Осы жазда Карбышевтiң отряды Терiсаққанның басында Көкшетау деген жерде Орманшы-Төртуыл ауылдарын зеңбiрекпен атқылап, тас-талқанын шығарды. Орманшы мен Қаржас руларының шешелерi бiр деп саналады, қиыншылық кезде бiр-бiрiн тастамайтын елдер. Қатар көшiп бара жатқан екi ел малынан да, жанынан да айрылып қалған-құтқаны елге қайтты.
Кенесары 1838 жылдың желтоқсан айында Батыс-Сiбiр генерал-губернаторына жазған хатында көтерiлiсшiлердiң негiзгi талаптарына қоса (дуандардың көзiн құрту, жалаушы отрядтардың қырғынын тоқтату, қолға түскен тұтқындарды босату, т.б.) осы Азынабай тұқымының әйел-қыздарын орыс тұтқынынан босатуды талап етедi. Ақыр түбiнде осы мәселе 1839 жылы жазғытұрым Сейтен мен Тайжанның өз еркiмен орыс қолына түсуiне алып келедi.
«Өзге қазақпен жұмысы да жоқ. Бiрi болыс, бiрi қазы болып, Кенесарыға ерiп кеткендiгiнен орыстар Азынабай балаларын ұстап алып, қара ала ағашқа таңдырып, Тайжанды аттырып, Сейтендi айдатып жiберген. Сол замандағы шайырлардың өлеңi:
Он жетi мың Азнабай жылқы айдаған,
Үш жерге найзасына ту байлаған.
Ол кiмнiң төбесiне құй қазыпты,
Тайжанды атып, Сейтендi iшке айдаған!» деп бұл оқиғаны М.Ж.Көпейұлы да баяндайды. Саққұлақ шежiресi Сейтен мен Тайжанның үстiнен сот үкiмi Ақмола бекiнiсiнде айтылды дейдi. Сотты «Иван Семенович» деп атайды, соған қарағанда сотник Карбышевтiң осы жазалаушы сотқа қатысы болса керек.
Тайжанды қараала бағанға байлап, Ақмола бекiнiсiнде атқаны анық, сол жерде жерленгенi де белгiлi. Егер қазiргi көшелердiң есебiнен қарасақ, бекiнiс орны бiр қапталынан Желтоқсан, екiншi қапталынан Сарыарқа, қас бетiнен Кенесары көшелерiнiң арасында. Бекiнiстiң орталық алаңы қазiргi күнi Ирченко мен Красная көшелерiнiң қиылысына сәйкес келедi. Ендеше, Тайжан батырды да сол жерде атты деп болжам жасаймыз. Тайжанның ағасы Сейтен батыр Сiбiрге жер аударылып, Березов өлкесiнде өмiрден қайтты. Қазақ бұл жердi Қайың Тұра дейдi. I Петрдiң көмекшiсi болған Меншиковтың, Орта жүздiң ханы боламын деп талап қылған Ғұбайдолланың айдауда болған жерi. Сейтен мен Ғұбайдолла Қайың Тұрада кездескен екен дейдi, бiрақ, бұл бөлек әңгiме.
Жамбыл Артықбаев,
Л.Гумилев атындағы Еуразия ұлттық университетiнiң профессоры
Сейтен-Тайжан әңгiмесiн қариялар Қонырқұлжа сұлтанның шешесi Абыл ханымға ас берген уақыттан бастап айтады. Асты ың-шыңсыз өткiзу үшiн Қонырқұлжа осы маңның қазағының iшiнде алғаш рет Омбыдан он шақты казак-орыс әскерiн алдыртқан екен. Қазақтың ас беру рәсiмiнде мылтығы сорайып, орыс әскерiнiң жүргенiн Сейтен, Тайжан ұнатпай, қалың топта наразылық бiлдiрген.