«ШАҢЫРАҚ» СЫЙЛАҒАН ШАБЫТ
Тұңғыш Президент күні қарсаңында Қазақстан халқы ассамблеясының этножурналистика саласындағы республикалық «Шаңырақ» шығармашылық байқауы қорытындыланды.
Бұл шара Қазақстан халқының бірлігін нығайту және этносаралық қатынастар мен мәдениетаралық үндестік саласындағы мемлекеттік саясаттың жетістіктерін насихаттау мақсатында ұйымдастырылған. Республикалық байқауға журналистермен бірге мәдениеттанушы ғалымдар, сарапшылар да қатысты.
– Этножурналистика саласында отандық бұқаралық ақпарат құралдарының рөлі мен жауапкершілігін арттыруды негізге алған конкурсқа жетпістен астам жұмыс келіп түсті. Қазақстандық патриотизмді нығайтуға, этномәдени орталықтардың қызметін түсіндіруге және мемлекеттік тілдің рөлін көтеруге бағытталған мақалалар, теле-радиобағдарламалар арасынан аталымы бойынша үздіктерін таңдауға тырыстық, – деді қазылар алқасының мүшесі Л.Гумилев атындағы ЕҰУ Журналистика және саясаттану факультетінің деканы Қайрат Сақ.
Биылғы жарыстың жеңімпаздары қатарында Татьяна Жандилдинова, Нағашыбай Қабылбек, Ярослав Красиенко, Михаил Парипса, Нұрбек Әмиша, Жанар Сайлаубекқызы, Дария Биданова есімдері аталып, бағалы сыйлықтар табыс етілді.
Айгүл УАЙСОВА