…1980 жылғы Мәскеуде өткен Олимпиада ойындарынан кейін бокс үйірмелеріне қазақ балалары қаптап келе бастады. Шаршы алаңда керемет әдісімен, мәнерімен көзге түскен Серік Қонақбаев секілді боламын деп талпынған жасөспірімнің бірі Ерболат Ашимов еді.
Ол кезде Астана іргесіндегі Интернациональный кентінен қалаға бір-ақ автобус жүретін. Қала мен кенттің арасы алыс емес. Ерболат бокс секциясына жазылғалы осы екі ортада күн сайын жүретін болып алды. Бала болып бір шаршадым демейді. Жаттығудан бір қалмайды. Күнде кешкісін терлеп-тепшіп келетін ұлына әкесі Олжабай бірде «Балам-ау, жалыққан жоқсың ба, күнде қалаға барасың, шаршап-шалдығып келесің, осыны қойсаң қайтеді… Мынау ағаң да өзімен қоймай кіп-кішкентай сені де желіктіріп жүрген…» деп екі ұлына біраз әңгімесін айтқан да болатын. Әке сөзінің жаны бар еді. Ерболатты боксқа жетектеп апарған ағасы Жанболат болатын. Алайда, айтқан бетінен қайтпайтын Ерболат сол бетте «Жоқ, әке, боксты қоймаймын! Мен қиналып жүрген жоқпын. Маған шаршы алаңда айқасқан ұнайды» деп әкесіне ойындағысын бүкпей айтып салды. Содан кейін салмақты да салиқалы әкесі де, аяулы анасы Майраш та бокс жайлы айтуды доғарып, қайта ұлдарының ұмтылысына қолдау білдіре бастады.
Алғашқы бапкері Әмір Әубәкіров киіктің асығындай Ерболатқа үлкен сеніммен қарады. Бапкерге, әсіресе, шәкіртінің мінезі ұнайтын. Қызуқанды болатын. Шаршы алаңға шыққанда жанары оттай жанатын. Өзіне соққы алғанды ұнатпайтын. Ал соққы алса қарымта қайтарғанша екпіні басылмайтын. Жеңіл салмақта айқасқан, шар болаттай шып-шымыр жігіттің боксына жанкүйерлер қызыға қарайтын.
Былғары қолғапқа арбалған Ерболат жыл өткен сайын шеберлігі шыңдалып, тәжірибесі толыса түсті. Жасөспірімдер мен жастар арасындағы республикалық жарыстардан жүлдесіз қайтпайтын болды. Ол кезде, яғни өткен ғасырдың сексенінші жылдары Совет одағында спорттық атаққа қол жеткізу оңай емес-тін. «КСРО чемпионатын ұтқаннан Еуропа чемпионы болу жеңіл» дейтін сөз сол кезде тегін айтылмайтын.
Ерболат Ашимов бірнеше рет республика чемпионатында жүлдегерлер қатарынан көрінгені үшін КСРО спорт шеберлігіне кандидат деген атаққа ие болды. Енді ересектер жарысына түсем деп жүргенінде әскерге шақыру алды.
…1985 жылдың көктемінде өз қатарластарынан қалмай Қарулы күштердің қатарына қосылды. Алғашқыда алысқа ұзаған жоқ. Отардағы әскери-оқу бөлімшесіне түсті. Сержант атағын алғаннан кейін Қырғызстанда орналасқан М.Фрунзе атындағы гвардиялық 282-ші мотоатқыштар полкінің бірінші тау батальонына аттанды. Мұнда таулы жағдайдағы соғыс қимылдарына дайындықтан өтті. Күні-түні тау шатқалдарындағы жаттығуларға қатысты. 1986 жылдың сәуір айында полк басшылығы бұйрығымен Ауғанстанға жол тартты.
Бала кезінен шаршы алаңда шыңдалған, әскери оқуда да үздік болған жас жауынгердің қабілет-қарымын Кабул қаласындағы Бас әскери кеңесшілік басшылығы бірден аңғарды. Оны байланыс қызметіне алып қалды. Осылайша, Ерболат үшін жауапты қызмет басталып кетті. Біртіндеп соғыс жағдайына еті үйренген жас сержантты басшылық Герат провинциясына жіберуді ұйғарды. Бұл кезде аталмыш провинция аумағында моджахедтер тарапынан Кеңес әскерлері мен Ауғанстан халық армиясына қарсы шабуылдар күшейіп, көптеген жауынгерлер қаза болған қиян-кескі оқиғалар орын алған. Бұл жөнінде жоғарғы әскери қолбасшылық та, қатардағы жауынгерлер де хабардар болатын. Ерболат болса Ауғанстан халықтық армиясының 17-ші жаяу әскер дивизиясына жауапты әскери кеңесшінің оққағары әрі жүргізушісі міндетін атқаруға кірісті. Дәл осы кезде Ерболат Ауғанстан соғысының алапатын жан-жүрегімен сезінді. Алайда, соғыс жұмсақ болғанды жақтырмайтынын қазақ жауынгері жақсы түйсінетін. Сондықтан ол қандай қиындық болса да қайыспауға тырысты. Оққа ұшып қаза болған, жарақаттан жанайқайы шырқыраған майдандас сарбаздарды көрген сайын көңілі құлазып кететін. Бірақ ол соғыстың өзі өмір үшін айқас екенін тереңінен түсінген еді. Осы қағидаттан айнымай, Отан алдындағы жауынгерлік антын адал атқара білді. Әскери басшылық та Ашимовтың жауынгерлік ерлігін бағалады. Ол бірнеше медальдармен марапатталды. Елгезек те ақжарқын азамат бүгінде Астана қаласының Ауғанстан соғысы мүгедектері мен ардагерлері одағы, ҚР Ауғанстан соғысы және ашық қақтығыстар ардагерлері одағы ұйымдары аясында жүргізілетін қоғамдық шараларға белсенді қатысып жүр. Майдандас достары болса «Ерболат біздің патриот» деп құрмет тұтады.
Әскерден аман-есен оралған Ерболат жауынгер алдымен жоғары оқуға түсуді мақсат етті. «Талаптыға нұр жауар» деген емес пе, Астанадағы Еуразия гуманитарлық университетінде оқып, заңгер мамандығын алды. Одан кейін Қарағанды экономикалық университетін тәмамдады. Алайда, боксқа деген құштарлығы өз дегенін істетпей қоймады. Ерболат үшін тер мүңкіген спорт залы, шаршы алаңдағы шайқастар, жүлдеге таластырған жарыстардың орны бөлек еді. Ақыры жүрегінің әміріне көніп боксқа қайта оралды. Алдымен «Көкше» университетінің дене шынықтыру және спорт факультетіне оқуға түсіп, бокстан жаттықтырушы мамандығын алып шықты. Дипломын алған соң тәжірибелі спорт маманы Мұрат Мұстафин жетекшілік ететін Астанадағы №3 Олимпиадалық резервтегі балалар мен жасөспірімдер спорт мектебінде жаттықтырушы болып іске кірісті. «Ұяда не көрсең, ұшқанда соны ілесің» демекші, Ерболаттың тұңғышы Илияс жасөспірімдер мен жастар арасындағы республикалық және халықаралық жарыстарда топ жарса, Темірланы мен кенжесі Мансұр бүгінде әкелерінен тәлім алып жүр. Ал сүйген жары Татьяна болса, әкелі-балалы спортшылар әулетінің басты жанкүйері болып келеді.
Е.Ашимов бапкер бола жүріп төрешілік қызметті де қатар алып жүрді. Табиғатынан әділдікті қалайтын, соғыс алапатын көрген, бокстың қыр-сырын меңгерген азаматтың шаршы алаңдағы төрешілік жасауына бокс федерациясы тарапынан жоғары баға беріліп, ол республикалық жарыстарға қызмет көрсете бастады. Кәсіби шеберлікті жетілдіру семинарларына қатысып, тиісті сертификаттарға ие болды. Бүгінде Астана қалалық бокс федерациясы төрешілер алқасының төрағасы міндетін де атқарады. Өзіне жүктелген сенімді ақтай білген Ерболат Ашимов соңғы жылдары ересектер арасындағы Қазақстан чемпионаты мен «А» класты халықаралық турнирлерде қазылық жасап жүр. Жақында АИБА-ның халықаралық дәрежедегі төрешісі атағын да алды.
Бала кезінен боксқа арбалған Ерболат Олжабайұлы жақында тағы бір қуанышқа кенелді. Олимпиада жүлдегері Марина Вольнова жүлдесі үшін өткен халықаралық турнир барысында бокстан Қазақстанның мемлекеттік жаттықтырушысы Болат Абдрахманов республикалық бокс федерациясы атынан бір топ мамандарға «Қазақстан боксына 85 жыл» атаулы медальдарын салтанатты жағдайда табыс етті. Мерейі өскен азаматтар қатарында астаналық Ерболат Ашимов та болды. Олимпиада чемпионы Ермахан Ибрайымовтың қолынан алғыс хат алды.
Жауынгер-интернационалист, спортшы, бапкер әрі төреші азаматтың ақ жолы ұзағынан сүйіндірсін.