Шерлі тарих шежіресі
Астана қаласының Мемлекеттік мұрағаты астаналық ардагерлермен кездесу өткізіп, «Отан үшін отқа түс – күймейсің» атты фотоқұжаттамалық көрме өткізді.
Мұрағат ұжымы құрметтеп шақырған ардагерлердің қатарында Василий Сонин, Константин Смирнов, Алексей Фролов және Нина Клюшко секілді қариялар бар. Олардың құрметіне концерттік бағдарлама ұсынылып, Жеңіс күніне байланысты естеліктер айтылды.
Ал мұрағат ұйымдастырған көрме туралы жеке әңгімелеуге болады. Ол – соғыс жылдары тарихының жылнамасы секілді. Мұнда Ақмола қаласында құрылған дивизиялар жөнінде, олардың жауынгерлік ерлігін баяндайтын құжаттар алғаш рет қойылыпты.
Астана қаласы Мемлекеттік мұрағат мамандарының мәліметінше, Подольск қаласында орналасқан Ресей Федерациясы Қорғаныс министрлігінің Орталық мұрағатында елімізге қатысты құнды деректер табылған. Осы және басқа да бірегей құжаттар көрме сөрелерінен орын алды.
Соғыс жылдары Ақмола өңірінде төрт әскери құраманын штабы орналасқаны тарихтан мәлім. Олар: 310-шы, 387-ші, 29-шы атқыштар және 106-шы аттылы дивизиялар. Бұл әскери күш соғыстың зұлмат жылдарында жауға қарсы ерлікпен шайқасып, тарихта аты қалды. Көрмеде дивизияның майдандық даңқы небір бағалы құжаттармен баяндалыпты. Атап айтқанда, дивизияның ұрыс қимылдарының журналы мен карталары, ұрыс хабарлары, қайтарылмайтын шығындар тізімдері, тағы басқа да мәліметтер қойылған.
Ұлы Отан соғысы халыққа үлкен зардап әкелгенін жұртшылық жақсы біледі. Майданға аттанып, елі мен жерін қорғаған азаматтардың ішінде 9783 ақмолалық бар. Соның 7414-і соғыстан қайтқан жоқ. Мұндай батыр жауангерлердің батыл қимылдарын суреттеген құжаттар да көрменің төрінен орын алды.
Сондай-ақ, мұнда соғыс уақытында майдангерлер қолданған заттар да жәдігер ретінде көрмеге қойылған.
Жалпы көрме әскери-мобилизациялау туралы, қорғаныс жұмыстары жөніндегі архив құжаттарынан басталады. Әрі қарай Ақмоланың соғыс жылдарындағы экономикалық-әлеуметтік жағдайынан сыр шертетін құжаттармен танысуға болады. Соғыс басталған сәттен бастап, аяқталғанға дейінгі халықтың ахуалы мен митингтер, әртүрлі ұйымдастырылған
шаралар жөнінде сипаттайтын жәдігерлерді де осы жерден көруге болады.
Қымбат ТОҚТАМҰРАТ