Тәуелсіздік алған жылдардан кейін Астанамыз бой көтеріп талай тарихи сәттерге қол жеткіздік. Бас қаламыз Астана атанғаннан күннен бастап жаңа қаланың дамуы басталып, бүгінгі күнге дейін жалғасын тауып жатыр. Осы аптада елордада ашылған тұңғыш қазақ мектебі Әлімхан Ермеков атындағы №38 мектеп-лицейінде 25 жылдығымызды атап өттік.
Астанадағы қазақ мектептерінің көшін бастаған оқу орны тарихтан өзіндік орнын алды. Мектеп-лицейдің алғашқы директоры Жамал Қасымбекқызының көшбасшылығымен 3 жыл қатарынан, 2006, 2007, 2008 жылдары Астана қаласындағы «Үздік мектеп» номинациясын жеңіп алып, 2011 жылы «Көшбасшы мектеп», 2012 жылы «Үздік мектеп» номинациясын иеленген еді. 2013 жылы Лондондағы Халықаралық BID сапа бойынша конвенция №38 мектепті кемелдіктің бұлжымас сапасының беріктігі үшін «Алтын тәж» IQC жүлдесімен марапатаған мектеп ретінде тарихта өзіндік орны бар. Қазіргі таңда мектеп директоры болып Қадырғазы Камалұлы ұжымда оқушыға білім беру мен тәрбиелеуде үйлесімді орта қалыптастырып, біршама жетістіктерге жетіп отыр. Атап айтар болсақ, 2019-2024 жылдары мектеп-лицей ұстаздары Lesson Study зерттеу жұмысы бойынша халықаралық конференциясына қатысты, 2023 жылы елорда “Үздік олимпиада командасы-2023”, 2022-2023 жылы елорда мектептері арасынан “Үздік 10 мектеп” номинациясын иеленді., халықаралық роботтар конкурсы “Venom” командасы жеңімпаз атанды, елорда мектептер арасынан “Үздік олимпиада командасы-2023» марапаты, 2022-2024 оқу жылдары қалалық «Шаттық» өнер байқауында 7 алтын, 4 күміс, 5 қола медаль иеленді. 2024 жыл Дүниежүзілік Көшпенділер ойынында «Бес асық» ойыны бойынша дене шынықтыру пәні мұғалімі Елемес Перизат алтыннан алқа тағып, «Еңбек ері» медалімен марапатталды. 2024 жылы №38 мектеп-лицей үшін тарихи кезең болды. Мектебіміз қазақтың біртуар азаматы, қазақтан шыққан тұңғыш математик, профессор, Алаш қайраткері Әлімхан Ермеков атын алды. Бұл біздің мектебіміздің 25 жылдық мерейтойына арналған тамаша тарту болды.
Мектептің ширек ғасырлық мерейтойы барысында «Мектебіме ширек ғасыр» естеліктер кітабының тұсаукесері өткізілді. Мектепішілік «Әлімхан Ермеков» медалі осы мектепте еңбек жолын жас маман болып бастап, 15 жылдан астам үзіліссіз еңбек етіп жүрген ұстаздарға табысталды.
№38 мектеп-лицейдің 25 жылдық мерейтойына арналған ғылыми-танымдық конференцияда Астана қаласы Білім басқармасының басшысы Қасымхан Сенғазыұлы, Астана қаласының бала құқықтары жөніндегі уәкілі Әсима Бимендина, қоғам қайраткері Әкім Ысқақ, әлімхантанушы ғалым Қанат Өскембаев, ЕҰУ экономикалық география кафедрасының аға оқытушысы Кайрат Сагинов, Пенсильвания университетінің ғылыми қызметкері, мектеп түлегі Айнұр Қадырбаева, мектептен шыққан 20 басшының атынан сөйлеген Сәуле Әзімханова осы №38 мектебінің Астананың білім тарихындағы көшбасшылық бейнесі мен тағылымдық тәжірибелеріне кеңінен тоқталды.
Конференция соңы мектеп көркемөнерпаздарының мерекелік концертіне ұласып, айтыскер ақын Нартау Тілеуқұл толғау арнаса, танымал әнші Гүлнұр Оразымбетова мен жас әнші Әйгерім Тілеубек әннен шашу шашты.
Қамар Бірлесова
Әлімхан Ермеков атындағы №38 мектеп-лицейі
директорының бейіндік оқыту ісі жөніндегі орынбасары
