«Ауыл» партиясының 25 жылдық белесі» атты партияның Астана филиалы саяси кеңесінің кеңейтілген отырысы өтті. Іс-шараға Астана қалалық Ішкі саясат басқармасының басшысы Нұрдәулет Әлмұханов және «Ауыл» партиясының мүшелері мен ардагерлері, жастар қанатының өкілдері қатысты.
Жиналыс барысында қалалық Ішкі саясат басқармасының басшысы Нұрдәулет Әлмұханов қатысушыларды мерейтоймен құттықтап, партия филиалының төрағасына алғыс хат тапсырды.
– «Ауыл» партиясы ширек ғасыр бойы еліміздің ауыл шаруашылығы мен агроөнеркәсіп кешенін дамытуға, ұлттық құндылықтарды сақтауға және әлеуметтік әділдікті қамтамасыз етуге үлес қосып келеді. Партияның қызметі Қазақстан Республикасының стратегиялық бағыттарымен үйлесім тауып, елдің тұрақты дамуына ықпал етуде. Шын мәнінде, қазіргі жастардың санасында «ауыл көркейсе, ел көркейеді» деген түсінік қалыптастыруымыз керек. Өйткені қазақтың тамыры ауылдан ешқашан үзілмейді. Сондықтан партия құрамындағы жастардың бастамаларына, партияның дамуына, өздеріңіздің бағдарламаларыңызды толықтай жүзеге асыруларыңызға әрқашан сәттілік тілеймін! – деді Нұрдәулет Әлмұханов.
Ал партияның Астана қалалық филиалының төрағасы Мейрамбай Оралов оның ел дамуына қосқан үлесін атап өтті. Сондай-ақ ұлт мүддесіне адал қызмет еткен, ауыл шаруашылығы мен қоғам дамуына сүбелі үлес қосқан партия ардагерлеріне айрықша алғыс айтты.
– Өздеріңізге мәлім, былтыр жазда өткен XXIV съезде «Ауыл» партиясы жаңа саяси бағдарламасын қабылдады. Ол ел ішіндегі және әлемдік экономикадағы өзгерістерді ескере отырып әзірленді. Өткен жылы біздің партияның ребрендингі де өтті. Саяси бағдарламаның атауы – «Ауылды өркендету – елді өркендету». Оның басты мақсаты – ауылдық аумақтардың тұрақты дамуын қамтамасыз ету, адамдардың өмір сапасын жақсарту, аграрлық секторды қолдау және ұлттық мәдени дәстүрлерді сақтау. Қазақстанды күшті аграрлық державаға айналдыру жөніндегі мақсатымыз Мемлекет басшысының 14 наурызда Бурабайда өткен IV Ұлттық құрылтайда айтқан ұлттық мақсатымен үндесіп отыр, – деді филиал төрағасы Мейрамбай Әскербайұлы.
Жиналыста партияның алдағы мақсаттары мен басымдықтары айқындалып, ауылды дамыту, аграрлық секторды қолдау және ұлттық құндылықтарды сақтау бағытында нақты ұсыныстар жасалды. Сондай-ақ алдағы уақытта атқарылатын жұмыс жоспары талқыланды.
Шапағат ӘБДІР
