Мұндай датчиктер Байқоңыр ауданындағы әлеуметтік жағынан аз қамтылған және көпбалалы отбасылар мен жалғызбасты қариялардың 70-ке жуық үйін қамтымақ. Бұдан бөлек, осы аудандағы тұрмысы төмен отбасыларға көмек көрсету мақсатында 30 үйдің пеш құбырларын тазарту жұмыстары жүргізілмек.
Ал Сарыарқа ауданындағы осындай санаттағы отбасылардың үйіне 500 улы газ датчигі мен 500 түтін датчигі орнатылады деп жоспарлануда. Сарыарқа ауданындағы жеке сектор үйлерін аралайтын мобильдік топ құрылып, оның құрамына ТЖ басқармасы мен жергілікті полиция қызметкерлері және еріктілермен қатар, кәсіпкерлердің қолдауымен пеш мамандары да тартылған. Олар әлеуметтік-әлсіз топқа жататын тұрғындар үйлерінің өртке қарсы қауіпсіздігін тексеріп, мұржаларды тазалау жұмысын да жүргізбек.
– Профилактикалық жұмыстар жылыту маусымы басталған уақыттан бері жүргізіліп келеді. Соңғы төтенше жағдайларға байланысты бұл жұмыстар күшейтілген режимге көшті. Соған орай сенбі-жексенбі күндері департамент гарнизонының жеке құрамы жер үйлерге рейд жасап, өртке қарсы қауіпсіздік шарасын түсіндіру жұмыстары жүргізілді. Ал улы газға арналған датчиктер демеушілер қаржысына орнатылуда. Сонымен қатар кейбір үйлердің мұржаларын тазалауды да қолға алып жатырмыз. Бірақ тұрғындарды біреудің келуін күтпей, өздері де үйлерін барынша күтіп, қауіпсіздік шараларын қатаң ұстануға шақырамыз, – дейді Байқоңыр ауданы Төтенше жағдайлар басқармасының басшысы Еркін Отарғалымұлы.
Айта кету керек, бес баланың өмірін жалмаған елордадағы уақытша тұрғызылған үйлердің бірінде болған қызыл жалынның себебі анықталды. ҚР ІІМ ТЖК Азаматтық қорғау саласындағы апатты жағдайлардың қауіп-қатерін төмендету мен бақылау басқармасы басшысының орынбасары Жасұлан Ақтаевтың мәліметінше, үйдің төбесі мен ыс сорғыштың арасында қажетті арақашықтық қарастырылмай, мұржа дұрыс бекітілмеген.
