«Шығыс барысы» топ жарды
«Шығыс барысы» деген лақап атымен танымал семейлік балуан Айбек Нұғымаров биыл үшінші жыл қатарынан өткізіліп отырған «Қазақстан барысы» турнирінің жеңімпазы атанды. Ол ақтық сында қарағандылық Ержан Шынкеевтің (лақап аты – Көкбөрі Керней) жауырынын жерге тигізіп, таза жеңіске қол жеткізді.
Былтырғы жылдың «барысы» атанған жамбылдық балуан Бейбіт Ыстыбаев жартылай финалда сүрінді. Ержан Шынкеевпен белдескен ол тартысты белдесуде қарсыласына жол берді. Дегенмен, төрешілер алғашында Бейбітті жеңімпаз деп тапқан болатын. Кейін өзара ақылдаса келе, шешімін өзгертіп, Шынкеевті ақтық сынға шығарды. Оқиғаны тарқата айтсақ, әуелі Ержан Ыстыбаевты алып ұрған болатын. Сырт көзге солай көрінгенімен, Бейбіттің жауырыны түгіл, жамбасы да жер иіскемепті. Құлап бара жатып, «барыс» қол тіреп үлгерген екен. Қазақ күресінің ережесі бойынша, мұндай жағдайда әдіс толық жасалмады деп, еш ұпай бермеуі керек. Басында солай болды да! Бірақ, Шынкеев төрешілердің бұл шешіміне ашық наразылық танытты. Көрермендер де, Ержанның жанкүйерлері де тұс-тұстан қиқулап, шулап қоя бергенде төрешілер «екеуі белдессін» деген үкім айтқан. Атан жілікті Ыстыбаевтың дүлей күші шыдатсын ба, Шынкеев тегеурін таныта алмай, боз кілемнен шығып қалды. Бұл Бейбіт жеңді деген сөз еді. Бірақ, мұны да Ержан мойындамады, әлгі ұпайын қайта даулады. Осы тұста бозкілемге қамшы лақтырып, бапкері «датын» айтса да жарасар ма еді? Ержанның қазылар алқасына бір өзі дау айтқаны әбестеу көрінді. Ақыры, жеңіс Шынкеевке «бұйырды».
Жартылай финалда жеңген екеу бірінші орынға, жеңілген екеу қолаға таласатыны белгілі. Бірер сәттен кейін Бейбіт үшінші орын үшін болатын белдесуге шығады деп күткенбіз. Бірақ, өзгерген шешім «барыстың» шамына тиді ме, ол бозкілемге шықпады. Сөйтіп, қола жүлде шымкенттік Назар Ерсұлтановтың еншісіне тиді.
«Қазақстан барысы-2013» атағын жеңіп алған Айбек Нұғымаровқа 150 мың АҚШ доллары мен «Алтын белбеу», «Тайтұйяқ» және автокөлік сыйға тартылса, күміс жүлдені иеленген Ержан Шынкеевке 30 мың, ал қоланы қанағат тұтқан Н.Ерсұлтановқа 10 мың АҚШ доллары сыйға берілді.
Ербол ЖАНАТ