Мамыр айының 17-18 жұлдызында өтетін Астананың Санкт-Петербургтегі мәдени күндері аясында Михайлов театрында «Astana Ballet» шығармашылық ұжымы өнер көрсетеді.
Әсіресе би мен музыканы шебер шендестірген бекзат өнер – опера мен балетке келгенде ерекше ынтызар петерборлықтардың театрға да, талғамға да бай шаһар екені рас. Революцияға дейін бір орталықтан, императорлық театр дирекциясы арқылы басқарылған атақты Мария, Александр театрларының қатарына кенже қосылған Михайловканың тарихының өзі әріден тартып сөйлейді. Алғашқы кездері өз труппасы болмаса да, I Павел патшаның ұлы князь Михайлдың атымен қалған сахнада сол замандарда француз, неміс оперетталары жиі қойылатын. Ол жерге Иоганн Штраус, Жак Оффенбах сынды композиторлардың табаны тиді, Матильда Кшесинская, Федор Шаляпин сияқты сырбаздар мен сұңғақтар «паһ!» дегізіп таңдай қақтырды.
Осынау қасиетті сахнаға елордамыздың жас өнер ұжымы «Astana Ballet» әдепкіден алабөтен концерт бағдарламасынан «базарлық» алып бара жатыр. «Шығыс Рапсодиясы». Қазақ халқының ұлттық биін, арасында әлем халықтарының дәстүрлі және заманауи би үлгілерін, орыс классикасын таныстыратын хореографиялық миниатюралар арқылы біздің өнерпаздар мәдени аралас-құраластығы бар, бүкіл әлеммен тамыр бүлкілі бір жайдары елдің өкілдері екенін Петербор жұртына паш етпек. Қазақстаннан, Астанадан ат терлетіп келетін өнерпаздардың афишасын күні бұрын аңдатпалап қойған Михайлов театрының сайтына бізде ерінбей-жалықпай кіріп шықтық. Шынтуайтында, хореографиялық нөмірлер жұмбаққа толы шығыс дүниесін әр қырынан танытатындай-ақ. Брусиловскийдің «Қазақ вальсі», Карл Дженкинстің «Қарлығашы», үндінің сарисвати, қытайдың тао йао, жапонның майко биі, «Chemirani», «Тұран» сынды этно-фольклорлық топтардың музыкасына қойылған көз сүйсіндірерлік композициялар бұйыртса сүттей аппақ түндер қаласын сұлу сазымен әлдилейді.
Әділбек ЖАПАҚ
