Шырайлы шыршатой
Кеше Оқушылар сарайында Астана қаласы әкімінің жаңажылдық шыршатойы өтті.
Салтанатты шараға келген жеткіншектер – балалар үйінің тәрбиеленушілері мен мектептердің үздік оқушылары және түрлі байқаулар мен фестивальдердің жүлдегерлері.
Балаларды келе жатқан жаңа жылмен құттықтаған қалалық Білім басқармасының бастығы Әсима Бимендина:
– Бүгін міне, 2013 жылды Елбасы Нұрсұлтан Назарбаев сыйлаған жаңа Оқушылар сарайында сіздермен бірге қарсы алып тұрғаныма қуаныштымын. Барлығыңа зор денсаулық, көп жақсылықтар тілеймін. Еліміздің ертеңіне лайық ұландары болып ержетіңдер, – деп ақ тілегін жеткізді.
Мереке барысында балалар өздеріне арналған жаңажылдық бағдарламаны тамашалады. Залдың қақ ортасында әдемі безендірілген үлкен шыршаны айналып би биледі, ән шырқады. Ертегі кейіпкерлерімен бірге, көңілді ойындардың қызығына кенелді. Уақыт ата, Ер төстік, Күнекей қыз және Шығыс күнтізбесіндегі жылдың он екі айының атауын иеленген жануарлар балдырғандармен тіл табысып, мереке көрігін қыздырды. Аяз ата мен Ақшақар да балдырғандарды қуанышқа бөлеп, көтеріңкі көңіл-күй сыйлады.
Әрине, мереке болғаннан кейін сый-сыяпатсыз оның сәні келе ме?! Шыршатойға қатысып, мәз-мәйрам болған балаларға Астана әкімінің атынан арнайы әзірленген сыйлықтар таратылды.
Жаңажылдық мерекеге орай сахналанған ойын-сауық бағдарламасына куә болып, ертегілер әлеміне саяхаттап қайтқан балалар тәтті тағамдарға толы дастарханнан дәм татты.
Қымбат ТОҚТАМҰРАТ