Елордалық прокуратура жастар арасында есірткі қылмысының алдын алу мақсатында қаланың оқу орындарында симуляциялық сот процестерін ұйымдастырды, деп хабарлайды www.astana-akshamy.kz/
Осындай іс-шаралардың бірі Ы.Алтынсарин атындағы №83 мектеп-гимназиясында өтті. Оған оқушылар, еріктілер, Алматы ауданы прокуратурасының қызметкерлері қатысты.
«Есірткі бизнесі бойынша қылмыстық істер кеңістігіне жастар, оның ішінде мектеп оқушылары көбірек тартылуда. Жастар арасындағы қылмыстық әрекеттердің алдын алу мақсатында аудан прокуратуралары жоғары оқу орындарында, мектептерде, колледждерде имитациялық сот процестерін ұйымдастырады. Әдістің мәні мынада: біз өз аудиториямызды сот процесіне толығымен енгіземіз. Оның барысында бейнежазбалар, қылмыстық іс материалдары, хаттамалар, сотталушыны ұстау сәтінің видеосы көрсетіледі. Бұл жерде бөлмеде отырған әрбір адам сот процесіне қатысушылар сезінетін эмоцияларды сезінеді. Прокурор, судья, адвокат болып жатқан жағдайды қарайды», — деді Алматы аудандық прокуратурасының бөлім басшысы Олжас Хайруллаев.
Симуляциялық үдеріс аясында мектеп оқушылары прокурор, судья, адвокат рөлінде өздерінің күштері мен қабілеттерін тексеруге мүмкіндік алды.
«Бүгінгі іс-шара Алматы ауданы прокуратурасының бастамасымен тәрбие жұмысы аясында өткізілуде. Біз прокуратура қызметкерлерімен бірнеше рет кездестік, олар мектепте дәріс оқыды. Енді біз теориялық біліммен шектеліп қана қоймай, бәрін шын мәніндегідей өткізуге көштік. Бұл үлкен тәжірибе. Сондай-ақ, жастар заңсыз әрекеттердің салдарын, олар қалай тергеліп жатқанын, қылмыскердің соты қалай өтетінін, есірткі қылмысы үшін қылмыстық кодекстің қандай баптары қарастырылғанын көргені маңызды. Симуляциялық сот процесі өте ұнады, бұл маңызды және өте пайдалы іс-шара, өйткені оны бір рет көрген дұрыс», — деп атап өтті Ы.Алтынсарин атындағы №83 мектеп-гимназиясының директоры Гүлмира Жарменова.
