«Скандинав жүрісі» –сергітетін серуен
Астана саябақтарында, Есілдің жағалауларында екі бірдей жіңішке таяқпен қаздаң басып, баяу адымдаған жүргіншілер көптеп кездесе бастады. Бұларды «Скандинав жүрісін» салауатты өмір салтына айналдыра бастағандардың алғашқы легі деуге болады.
Жаңа үрдіске спорт түрі ретінде қарайтын болсақ, өткен ғасырдың 40-жылдарынан бастап ене бастаған. Қос таяқпен жаяу жүріп жаттығудың түрін Финляндия жаттықтырушылары ойлап тапқан. Мақсаты – маусым аралығында шаңғышылардың бабында болуы үшін асқан қажеттілік еді. «Скандинав жүрісін» ұзақ жылдар бойына тек спортшылар арасында қолданылса, 90-жылдардан бастап бүкіл әлемнің қарттары қолына таяқ ұстап жолға шыққан секілді.
Уақыт өте келе бұл қос таяқтың егде адамдар үшін таптырмайтын дене шынықтырудың бірден-бір тиімді тәсілі екені мойындалды. Осы серуеннің арқасында адам денесі бұлшық еттерінің 90 пайызы шынығады. Артық салмақтан арылып, жүрек пен өкпенің жұмысы жақсарады. Жүрек-тамыр жүйесі сергіп, тірек-қозғалыс аппаратының кемтіктері қалпына келеді. Артериалды қан қысымы қалпында болып, жүйке жұмысы жақсарады.
Астана қаласы Саламатты өмір салты орталығында «Скандинавтықтардың салауатты жүрісімен айналысушылардың клубы жұмыс істейді. Оған әр жастағы кез келген адам келіп, нұсқаушының көмегімен алғашқы қадамын жасай алады. Бірер сабақтан кейін өздігінен таяққа сүйеніп жүруді тез меңгеріп алып кетеді екен.
– Медицина саласында зерттеулердің нәтижесінде оңалту жағдайында таптырмайтын тәсіл екеніне көзіміз жетіп отыр. Әсіресе, омыртқаларына зақым келгендер, инфаркт алғандар, тыныс алу жолдарының ауруынан кейін осы арқылы тез қалпына келді. Сонымен бірге, остеохондроз, артроз, остеопороз, ортопедиялық ауытқулары мен буын ауруларына, невроз бен ұйқысыздықта бұл дағды жақсы нәтиже береді.
Біздің клубқа тек науқастар емес, дені сау астаналықтар да тіркеліп жатады,– дейді жаттықтырушы Әсия Амангелдіқызы.