Қазақстандық кәсіпқой боксшы Геннадий Головкин чемпиондық дәрежесін қорғап қалу үшін ұлыбританиялық Мэттью Маклинмен кездесу өткізді.
«Бұған дейін Геннадий талай мықтымен жұдырық түйістірді ғой, дегенмен бұл жолғы қарсыласы олардан оқ бойы озық». Сарапшылар жекпе-жек алдында осылай деген. Маклинді асау мінезді, қызу қанды, айлакер де әккі боксшы ретінде танып үлгерген жанкүйерлер Генаға деген сеніміне селкеу түсірмегенімен, «қалай болар екен» деген сумақай сұрақ талайдың көкейін тескен.
«Болғаннан боладысы қызық» болған жекпе-жек өтті ақыры. Алғашқы раунд басталысымен қазақстандық бокссүйер қауымның көңіліндегі күмән бұлты сейіліп сала берді. Себебі, Генаның аңдысу сәтінен-ақ әлдеқайда сенімді, әлдеқайда шымыр екені аңғарылды. Алғашқы 3 минуттық кезең аяқталуға 10 секунд қалғанда оң қолымен танаудың үстін ала сілтеген соққысы Маклинді тәлтіректетіп жіберді. Шабуылды жалғастыра берем дегенде гонг «араша түсті». Екінші раундтың орта шеніне дейін таразы басы толығымен Гена жаққа ауып болды. Тіпті, біздің боксшымыздың әр соққысы британдықты сұлатып түсіре жаздап жатты. Келесі бір сәтте Головкин құлаштай ұрып, жақ тұсына дәл тигізгенде, Маклин рингтің «бесінші бұрышын» іздеп кетті. Үшінші раундтың ортасында Гена сол қолымен қарсыласының бүйір тұсына ауыр соққы жұмсады. Апперкот Маклиннің қабырғасын қаусатып жібергендей әсер қалдырды. Мэттью еріксіз екпетінен жата қалды.
Осы тұста кім-кімді де келесі қарсылас қай боксшы болар екен деген сұрақ мазалауы мүмкін. Головкиннің промоутері Том Леффлер мәлімдеуіне сенсек, WBA нұсқасы бойынша әлем чемпионы келесі қарсылас «Шоколад бала» лақап атымен танымал америкалық боксшы Питер Куиллин болуы мүмкін. Америкалық боксшы шаршы алаңда 28 кездесу өткізіп, барлығында да жеңіске жеткен, оның 20-сын нокаутпен аяқтаған. Ал Головкин өткізген 27 жекпе-жегінде де жеңіске жетіп, 24 қарсыласын нокаутқа жіберген.
Ербол ЖАНАТ
