СТУДЕНТТЕР ЖАСАҒЫ ҚҰРЫЛАДЫ
Жастар саясаты мәселелері басқармасының ұйымдастыруымен Астана қаласы әкімдігі жанындағы жастар істері жөніндегі кеңестің кезекті отырысы өтті. Оған қаладағы басқарма басшылары, оқу орындары өкілдері және жастар саясатын жүзеге асырушы ұйымдар мен белсенді жастар қатысты.
Жиында Ішкі істер департаменті Ювеналдық полиция бөлімшесінде есепте тұрған кәмелетке толмаған жасөспірімдер туралы Астана қаласы Балалардың құқығын қорғау басқармасының басшысы Рима Иманғазиеваның баяндамасы тыңдалды. Оның айтуынша, 2008 жылдан бері жасөспірімдер арасындағы құқықбұзушылық пен қылмыстар саны 58%-ға азайған. Қазіргі таңда Ішкі істер департаментінде 278 кәмелетке толмаған бала есепте тұр. Олардың көбісі – 15-18 жастағылар. Оның ішінде 78%-ы – ұлдар. Осы ретте Астана қаласы Жастар саясаты мәселелері басқармасының басшысы Талғат Рахманберді алдағы уақытта жасөспірімдер арасындағы қылмыстың одан сайын азаятындығын жеткізді. Өйткені, келесі жылдан бастап қалада полицияға көмек көрсететін студент жасағы құрылады. Олар ішкі істер басқармасына ресми түрде тіркеліп, кәдімгідей куәліктері беріледі. Жас көмекшілер жатақханалар, оқу орындарының ғимараты, қала көшелері мен тұратын мекенжайлары бойынша тәртіпті бақылайтын болады. Олардың дені – заң факультетінде оқитын студенттер.
Отырыс барысында жастар істері жөніндегі кеңестің 2014 жылға арналған жоспары баяндалды. Онда Астана қаласының емханаларындағы жастар денсаулық орталықтарының жұмысын жандандыру, кәсіптік және техникалық білім мекемелеріндегі жастар ісі жөніндегі комитеттердің жұмысын қарау, студенттерге жеңілдетілген жолақы енгізу мәселелері қарастырылатын болады. Талқылау қорытындысы бойынша Талғат Абайұлы қаладағы басқармаларға жастар саясатын тиімді жүзеге асыру бағытында бірқатар тапсырмалар берді.
Еркежан СӘТІМБЕК