СУ ҚАПТАУ ҚАУПІН СЕЙІЛТЕДІ
Кеше Астана қаласының әкімі Әділбек Жақсыбеков өткізген кезекті аппарат мәжілісінде демалыс күндері толассыз жауған жауын салдарын жою мәселелері мен елордадағы санитариялық-эпидемиологиялық жағдай талқыланды деп хабарлайды қала әкімінің баспасөз қызметі.
Нөсер салдарынан 16-17 мамыр күндері елорданың он екі учаскесін су басып, көлік қозғалысы шектелді. «Қазгидрометтің» мәліметі бойынша, жауын-шашынның айлық мөлшері 34 мм болса, сол күні бір тәулік ішінде 38,5 мм ылғал түскен. Синоптиктер елордада алдағы күндері де көшпелі бұлт шығып, жаңбыр жауатынын ескертеді.
– Жаңбыр жаууы қалыпты мөлшерден асып кетті және синоптиктердің болжамынша, мұндай жағдай алдағы уақытта да қайталануы мүмкін. Сондықтан, бұл күндері барлық техниканы жұмылдырып, күн сайын кезекшілік ұйымдастыру қажет. Қауіпті жерлерге су сору құрылғыларын орнату керек, – деді әкім.
Қаланың коммуналдық қызметтері күшейтілген тәртіппен жұмыс істеуде. Астана қаласында демалыс күндері 10 мың текше метрден аса жаңбыр суы сорылды.
Қала басшысы елорданың санитариялық-эпидемиологиялық жағдайына тоқтала келіп, тұрғындардың жаппай улануы қоғамдық тамақтану орындарында тиісті санитариялық талаптардың, азық-түлікті сақтау ережелерінің сақталмауынан екендігін атап өтті.
– Азық-түліктің дұрыс сақтал-
мауы, тазалық талаптарының орындалмауы, тағамның айналасында жүрген қызметкерлерінің кәсіби деңгейінің төмендігі, бақылаудың жоқтығы – осының барлығы, түптеп келгенде, қаладағы түйткілді мәселеге айналып отыр. Дәмханалар мен асханалардың жұмысы бақыланбайды. Бұл мәселелерді шешу үшін қаланың барлық құзіретті қызметтері жұмылдырылып, арнаулы рейдтер өткізіп, бақылауды күшейтуі қажет. Қала әкімі 10 маусымға дейін Астананың бар-лық қоғамдық тамақтану мекемелеріндегі санитариялық жағдайды тексеріп шығуды тапсырды.