Астананың ең көрікті жері – «Нұр жолы». Тамыз айының басында аталмыш аумақты жаңғырту жұмыстары басталды. Бүгінде құрылыс алаңы қоршалып, ондағы ескі тақтатастар түгел алынуда.
Мемлекет басшысының тапсырмасына сәйкес қолға алынған жоба республикалық бюджет есебінен қаржыландырылуда. Аумағының үлкендігіне қарай сулы-
нулы серуенжолды жаңарту тұтастай алғанда 33 гектар төрт жер теліміне бөлінген. Құрылыс-монтаж жұмыстары кезең-кезеңімен жүзеге асады. Астана қаласы Энергетика және коммуналдық шаруашылық басқармасының бас маманы Виталий Пустоветов: «Қазір төртінші аумақтың жұмыстары қарқынды жүргізілуде. Бұл Орынбор және Түркістан көшелерінен Достық пен Қонаев көшелеріне дейінгі аумақты қамтиды. Әзірге техника тартыла қоймады. Мұнда жұмысшылар қолдап жұмыс істеуде. Бетондар мен ескі тақтатастар ретімен алынып, сыртқа шығарылуда. Аумақтың құрылыс жұмыстарын қара күзге дейін аяқтау көзделуде. Жалпы, Ақордадан басталып, «Қазмұнайгаз» ғимаратына дейін созылып жатқан сулы-нулы серуенжол құрылысы 2014 жылы бітеді деп жоспарлануда» дейді.
Жоба бойынша жаңа көгалдар мен гүлдер, шырша, қайың, қарағай және терек отырғызылады. Бұдан бөлек, жарықтандыру, қоғамдық дәретханаларды ауыстыру, диспетчерлік орын мен бақылау камераларын орнату қарастырылған. Қала құрылысына жауапты мамандар барлық композиция ұлттық нақышта жасалатынын айтады.
Гүлмира аймағанбет
