Табиғат аясындағы тәрбие
Балалар жылы аясында елорданың іргесіндегі «Сарыжайлау» этнографиялық ауылында «Қара шаңырақ» ұлттық тәрбие беру мектебінің ұйымдастыруымен «Дара» шешендік оқу орталығының балаларына арналған «Экософия. Киелі табиғат» тақырыбындағы рухани-танымдық сабағы өткізілді. Оған Нұр-Сұлтан қаласы Тілдерді дамыту және архив ісі басқармасының басшысы Сәкен Есіркеп қатысты.
Іс-шараның мақсаты – баланы табиғатты сүюге, қоршаған ортаны қорғауға, экологиялық мәдениетке үйрету, адал еңбектің маңызын ұғындыру, кітап оқуға баулу, кітапқа деген құштарлығын арттыру, ана тіліне деген құрмет сезімін қалыптастыру, қабілетін ашу, жан-жақты дамыту.
Балалар орман аралап, самаурын қайнату үшін шыршаның бүрін, қураған тал жинады. Табиғатты қорғауға үйреніп, ұлттық ойындар ойнады. «Ертегі – ел ертеңі» жобасы аясында балаларға ертегі оқылды, сыйлыққа ертегі кітаптар таратылды. Балаларға киіз үй, ата-бабаларымыздың тұрмыс-тіршілігі жайлы мағлұмат берілді. Балалар шешендік өнерін көрсетті. Іс-шараға 20 бала және 10 ата-ана қатысты.
«Дара» оқу орталығының ұстаздары мен ата-аналар да «Қара шаңырақ» мектебінің ұрпақтың рухани-өнегелік тәрбиесі жолындағы атқарып отырған жұмысына ризашылығын білдіріп, бірлесіп ынтымақтастықта жұмыс істеу жайлы ойын жеткізді.