Астанада ауа райы құбылып тұр. Апта бойы қар жауып, қатты жел мен бұрқасын жалғасуда. Қазіргі уақытта қаланың коммуналдық қызметтері ауысымдық режимде тәулік бойы күшейтілген тәртіпте жұмыс істеп жатыр.
Қарашада түскен қар қалың болмаса да, жұртты едәуір әбігерге түсірді. Осыған орай жаяу жүргіншілер мен көліктердің жүрісін баяулатпау үшін қар тазалау үздіксіз жүргізілуде. Бұл ретте орталық көшелер мен жолдарды дер кезінде тазартып, көлік қозғалысын қамтамасыз ету үшін арнайы техникалар жұмылдырылды.
Түнгі ауысымға қала көшелерін қардан тазартуға 200-ге жуық жол жұмысшы мен 300-ден астам арнайы техника шықты. Олар ең алдымен, ережеге сәйкес, жолдарда кептеліс болмас үшін қозғалысы қарқынды орталық көшелерді тазартты. Сондай-ақ қаланың басқа көшелері, вокзал маңы аумақтары, тротуарлар, әлеуметтік нысандарға өтетін жолдар және т.б. қардан тазартылды.
Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.
«Қазгидромет» РМК деректері бойынша, алдағы күндері Астанада көшпелі бұлт, қар, боран болады. Оңтүстік-батыстан соққан желдің жылдамдығы – 9-14 м/с, екпіні – 15-20 м/с.
Қар тазалауға елорданың аудандары да атсалысуда. Мәселен, Сарыарқа ауданының аумағында қар шығару және санитарлық тазартуға 625 жұмысшы мен 184 арнайы техника жұмылдырылды. Сондай-ақ қар тазалау жұмыстарына шағын және орта бизнес өкілдері, білім беру, медициналық және мәдени мекемелер, МИБ/ПИК өкілдері қатысып, 400-ден астам адам әлеуметтік нысандардың аумағын жинауға атсалысты. Сонымен қатар, жолдарды көктайғаққа қарсы реагенттермен өңдеу жұмыстары жүргізілуде.
Аудан әкімінің аппараты дәстүр бойынша биыл да тұрғындардың ыңғайлылығы мен қар тазалау жұмыстарының тиімділігін арттыру мақсатында, арнайы қар тазалау кестесін ұсынып отыр. Осы кестеге сәйкес, тұрғындар коммуналдық қызметкерлер мен арнайы техниканың қозғалысын қамтамасыз ету үшін автокөліктерін уақытша басқа орынға қоюға мүмкіндік алады.
Кестеде жауапты мамандар мен мердігерлердің байланыс нөмірлері көрсетілген. Тұрғындар көмек қажет болған жағдайда аудандық аппараттың мамандарына тікелей хабарласа алады. Толық кестені @saryarqa.audany парақшасынан көре аласыз. Сонымен қатар, әрбір ауланың өзінде қар тазалау кестесі ілінген.
