ТАҒДЫР ШЕШТІ ТАҢДАУ
Ел өміріндегі ең елеулі саяси науқан абыроймен аяқталды. Қазақстандықтар қапысыз қалауын білдірді. Ақорданың иесі анықталды. Өркениет өріне ұмтылған халқымыз өз тағдырын тағы да Нұрсұлтан Назарбаевтай ұлтын ұлықтаған өр тұлғаға сеніп тапсырды.
Президент сайлауына әртүрлі себептермен әлемнің әр шалғайында жүрген отандастарымыз да белсене қатысқаны белгілі. Мәселен, Мәскеудегі Қазақстан Республикасы Елшілігі жанынан құрылған
№215 сайлау учаскесіне келушілер легі ақ таңнан – қара кешке дейін толастамағанын көзімізбен көрдік. Азаматтық парызын өтеуге асыққан ағайынның алабұртқан жүздерінен көтеріңкі көңіл-күйдің лебі аңғарылады. Бір-бірімен қуана қауышқан қандастарымыз өзара қазақша қауқылдасып, әдемі әсерге бөленді. Осы жақта тұрып жатқанына он жылға жуықтаған қаракөз қарындасымыз Кәмшат Болысбаева арман қуып, алысқа кеткенімен арттағы Атажұртын бір сәтке де естен шығармайтынын екпін түсіре айтты.
– Қазіргі таңда әлемдік қауымдастықтан ойып отырып орын алған тәуелсіз Қазақстан мен оның көреген көшбасшысы Нұрсұлтан Әбішұлы Назарбаев туралы ресейліктердің аузынан жылы сөзді жиі естимін. Сондай сәттерде кеудемді мақтаныш кернейді. Кешегі Кеңестік республикалар арасында оқ бойы озық тұрған мерейлі мемлекетіміздің абырой-беделі асқақтай бергей!
Ал, Кострома қаласындағы әскери академияның курсанты Рақыш Жұмабаев келешекте Қарулы Күштеріміздің қатарын толықтырмақ. Еліміздің ертеңін айқындауда айрықша орын алатын тағдыршешті таңдау жасауға мүмкіндік туғанына ризашылық танытқан жас сарбаз бұл сайлаудың санаға салмақ салар зор жауапкершілігін жете сезінетінін жеткізді.
Ресей Федерациясының Үкіметі жанындағы Қаржы университетінің студенті Әсел Таубаеваның ойынша, осы сайлауда біз Елбасын таңдап қана қоймай, бүкіл еліміздің алдағы уақытта қалай дамитынын айқындауға үлес қосамыз. Сондықтан, әрбір қазақстандықтың осыған орай орнықты көзқарасын білдіргені жөн.
Аталмыш сайлау комиссиясының төрағасы Виктор Темірбаевтың айтуынша, Мәскеуден басқа, Ресейдің Санкт-Петербург, Қазан, Омбы, Астрахань секілді қалаларындағы біздің дипломатиялық миссияларында қазақстандық азаматтардың дауыс беруіне жағдай жасалған. Олардың ұзын-саны үш мың адамның үстінде көрінеді. Бұларға іссапарда жүрген, қыдырып келген жерлестерімізді қоссақ, сайлаушылар саны біршамаға жетері анық.
Тоқсан ауыз сөздің тобықтай түйінін айтсақ, бұл күні Мәскеудегі учаскеге сайлаушылардың 95 пайыздан астамы келіп, олардың 99,73 пайызы Нұрсұлтан Назарбаевтың кандидатурасын қолдап дауыс берген.
Талғат БАТЫРХАН