Басты ақпаратҚала тіршілігі

ТАКСИ ҚЫЗМЕТІ ТАЛАПҚА САЙ МА?

Елордада такси қызметіне талап күшейіп, қала әкімдігі қауіпсіз такси қызметіне ерекше ден қоя бастады. Қала көшелеріне эконом, стандарт және бизнес-кластағы мыңнан аса көлік шықпақ. Бірыңғай таксидің салонында төлем картасын қабылдайтын терминал, таксометр және wi-fi орнатылады.

Бас қалада такси қызметіне сұраныс көп. Діттеген жеріңізге жедел жеткіңіз келсе, кез келген таксиге мініп кете бересіз. Бағасы да қолжетімді. Олардың қатарында заңды такси парк­терінің жүргізушілері де, «жабайы» такси де бар.
Бір жақын досым – такси жүргізушісі. Сол қызметімен Астанада адам тасып, отбасын асырайды. Тапқан табысының тең жарымын жалдап отырған баспанасы мен жаңадан алған көлігінің кредитіне төлейді. Әйтеуір, осы жұмыстан кеткісі жоқ. «Үйреніп қалғам, өзіме ұнайды» деп бір жымиып қояды. Расымен де бүгінгі таңда такси көптеген азаматтардың негізгі табыс табу көзіне айналды.
Такси қызметінің көрігі түнгі уақытта қызады. Таң атқанша көз ілмей жұмыс істейтіндер көп. Әсіресе, сондай кезде жабайы таксистердің айы оңынан туады. Олар адамдар көп шоғырланған орындарда жүреді. Мәселен, вокзал, әуежай, үлкен сауда орындары алдында заңсыз автотұрақ жасап алғандар баршылық. «Жабайы» таксистерге міну бір жағынан қауіпті. Жолдан кезіккен кез келген машинаға мініп, түрлі жағдайға ұшырап жатқан жандар елімізде көп. Сондықтан, жолаушылардың қауіпсіздігі алаңдатады.
Биылғы жылдың сәуір айында өткен Астана қаласының әлеуметтік-экономикалық да­муы мен ЭКСПО көрмесі мәсе­лелеріне арналған кеңесте Мемлекет басшысы елордадағы такси қызметіне тоқтала келіп: «Әлі күнге дейін заманауи такси қызметі жоқ. «Экотаксиді» алмағанда, барлық таксилер ала-құла, таксометрсіз, сыртқы түр­лерінің стандарты, бірыңғай киім формасы жоқ» деген еді.
Қазіргі таңда елорда халқының саны миллионға жақындады. Еліміздегі ірі мегополис десе де болады. Сол талапқа сәйкес бас қаладағы такси қызметі де жоғарғы деңгейде болуы қажет. Осыны ескерген елорда әкімдігі заңды жұмыс істеп жүрген таксилерге бірыңғай талаптар енгізбек. Жүргізушілер жүру ережелерін қатаң білу қажет. Жолаушылармен мәдениетті
тіл табысу керек. Уақыт талабы­на сай ағылшын тілін де мең­гер­ген жөн. Өйткені, алдымызда барлық әлем көз тігіп отырған «ЭКСПО–2017» халық­аралық көрмесі келе жатыр.
«Астана LRT» ЖШС Жолаушы көлігі басқармасының жетекшісі Бейбіт Есжановтың айтуынша, елордадағы такси желісін жетілдіруге арналған жоба «City taxi» деп аталады. «Таксидің сыртқы түрі бірыңғай форматта бекітілуі керек. Сонымен қатар осы қызмет түрі лицензиялануы қажет. Бұл лицензияны алу үшін жүргізуші алдымен тиісті маман­дандырылған оқу орнында біліктілігін жетілдіруге міндетті болады» дейді Бейбіт Есжанов.
Аталған жоба аясында такси инфрақұрылымын дамыту көз­делген. Бүгінде қала бойынша таксилерге арналған 47 орын жасақталған, алдағы уақытта оларды 300-ге дейін арттыру көзделген.


Асылы, такси қызметі нарық­тық қатынастар заңына бағын­ған. Бүгінде Астанада жеңіл кө­ліктермен жолаушылар және шағын жүк тасымалдаумен айналысатын 14 такси паркі тіркелген. Осыдан төрт жыл бұрын пай­далануға берілген «Астана Эко такси» қалалық таксопаркі қыз­меті жөнінде жұртшылық жылы пікірде. Олардың қызмет көрсету деңгейі айтарлықтай. Көліктердің барлығы уақыт талабына сай жарақталған. Эко­ло­гиялық отынмен жүреді.
Жо­лаушылардың қауіпсіздігі де қорғалған. Биылғы жаңа жылдан бастап Астана әуежайында жолау­шыларды ресми тасымалдаушы ретінде «Экотакси» өз қызметін жүзеге асыра бастады. Оның қызметкерлері жолаушыларды қарсы алып, кеңес береді.
Біз осы жерде елордадағы «Керуен» сауда ойын-сауық ор­та­­лығының алдында «Астана Company KZ» ЖШС такси жүр­гізушісі Сәкен Болат деген аза­матпен кездесіп, пікір­лескен едік.
– Осы мекемеде екі жылдан бері жұмыс істеймін. Біз адам­дарға тәулік бойы қызмет көр­сетеміз. Әрине, жүргізушілер ауысыммен ауысып отырады. Астанада такси қызметінде бәсекелестік күшті. Әсіресе, жа­байы таксилер алдымызды орайды. Сонда да өз клиент­те­рі­міздің көңілін қалдыр­май­мыз. Біздің фирмада 30-ға жуық ма­шина бар. Олардың барлығы заңды қызмет көрсетеді. Жолау­шыға шек береміз. Күніне ком­панияға машинаны жалға алған үшін бес жарым мың төлейміз. Оның сыртында жанармай бар, диспетчер қызметі де ақылы. Қалған табысымызбен отбасымызды асыраймыз. Арнайы қызмет киім киеміз. «ЭКСПО-2017» халықаралық көрмесіне мұқият дайындалып жатырмыз. Көліктеріміз де жаңарады, – дейді ол.
Қорыта келгенде, елордадағы такси қызметіне талап күшей­мек. Оның барлығы адамдардың қауіпсіздігі мен жайлылығы үшін атқарылып жатқан ізгілікті іс деуге болады.

Азамат ЕСЕНЖОЛ

Тағыда

Ұқсас жаңалықтар

Пікір үстеу

Э-пошта мекенжайыңыз жарияланбайды. Міндетті өрістер * таңбаланған

Back to top button