ҚР Ұлттық академиялық кітапханасында күйші, кинодраматург, жазушы, мәдениеттанушы, сан өнерді бір бойына тоғыстырған Таласбек Әсемқұловтың «Талтүс» атты CD альбомының тұсаукесері өтті. Шараға марқұммен кезінде дос, сыйлас болған адамдар мен өнердегі ізбасарлары жиналды.
Бас-аяғы 73 күй енген жинаққа сонау ғасырлар қойнауынан осы заманға жеткен Кетбұғаның, Қодан тайшының, сондай-ақ, Байжігіттің, күй тәңірісі – Тәттімбеттің, Қасабайдың, Қызылмойын Қуандықтың, Ақай қажының, Аққыздың, Жүнісбай Стамбаевтың күйлері және Таласбек Әсемқұловтың өзі шығарған 8 күйі топтастырылған. Аталған тұлғалар мұраларының насихатталуына альбом авторы кезінде азды-көпті үлесін қосты. Мәселен, Тәттімбет күйлерінің Парижде жарық көруіне еңбек сіңірді. Француз зерттеушілеріне Тәттімбет күйлерінің музыкалық және домбыра қағысындағы ерекшеліктерін түсіндіріп берді. Осы сұхбатты Сәуле және Гсавье Аллестерлер таспаға түсірген екен. Тұсаукесер басында бұл сұхбаттың үзіндісін көріп, күйшінің аяулы бейнесімен қауыштық.
Таласбек Әсемқұловтың өзінің алдына қойған талай жоспарлары бар еді. Отыз сегіз сценарий жазам деп жүріп, оннан астамын ғана жазып кетті. Сондай-ақ, «Талтүс» романының екінші томына кіріспекші болған. «Тәттімбет сері» романын аяқтай алмады. Қожа Ахмет Яссауидің «Диуани хикмет» еңбегі мен Габриэль Гарсия Маркестің «Жүз жылдық жалғыздық» романын да талдамақшы еді. Қазақтарға әлем әдебиетін қалай оқудың үлгісін көрсетуді де армандады. Осының бәріне күйбең тірлік мойнын бұрғызбады.
Алайда, дарынды жастарға жанашырлық танытып, біраз өнерпаздарды тәрбиелеп кетті. Халқымыз әке тұрып, ұлдың сөйлегенін құп көрмейді. Сол сияқты Таласбектің шәкірттерінің бірі, бұл күндері талантты күйші ретінде танылған Сәрсенғали Жүзбаев Таласбектің алдында күй тартпайды екен. Таласбек оның күйін тыңдау үшін достарына Сәрсенғалиға күй тартқызып, өзі тығылып тұрып тыңдайды екен. Тұсаукесерде осындай әсерлі естеліктер айтылды. Сәрсенғали Жүзбаев, Қайрат Айтбаев, Рүстем Нүркенов, Айтолқын Тоқтаған, Ақжусан Иманғызықызы күй шертті.
СD альбомының жарық көруіне демеушілік көрсеткен Жәрдем Құрманғазиев, тарихшы ғалым Бүркітбай Аяған, фольклортанушы Ақеділ Тойшанұлы, Астанадағы М.Горький атындағы мемлекеттік академиялық орыс драма театрының директоры Еркін Қасенов, қобызшы Раушан Оразбаева Таласбек Әсемқұлов туралы парасатты сөз қозғады. Таласбек бастапқыда медициналық институтта оқыған. Алайда, бойындағы өнері жеңіп, кейіннен Абай атындағы педагогикалық институттың филология факультетін бітірді. Өнер жолында жүріп, артында мол мұра қалдырды. Қазірде том-том болатын қолжазбалары мен жинаған күйлері жинақталып қалды. Тұлғаның жары Зира Наурызбаева соларды бірте-бірте жарыққа шығармақ. Соның алғашқы қарлығашы – «Талтүс» СD альбомы. Жиналғандар соның тұсаукесерінде марқайып, қолдау болса өзге де еңбектерінің таныстырылымында жолығайық деген оймен тарқасты.
Аманғали ҚАЛЖАНОВ