Талғат РАХМАНБЕРДІ: ЖАСТАРДЫҢ МАМАНДЫҚТЫ ДҰРЫС ТАҢДАУЫНА БАҒЫТ БЕРЕМІЗ
Талғат РАХМАНБЕРДІ, Жастар саясаты мәселелері жөніндегі басқарманың басшысы
– Бүгінгі таңда елорда жастарының алдында тұрған өзекті мәселе не?
– Қазіргі жастар арасындағы басты мәселе – мамандықты дұрыс таңдау. Себебі, бүгінде бас қала нарығында техникалық мамандықтарға сұраныс артып отыр. Ал, жастардың басым бөлігі әлі де болса гуманитарияның шылауынан шыға алмайды. Осы орайда біз оларға дұрыс бағдар беріп, бұл бағыттағы жұмысты жалғастырудамыз.
– Нақты қандай шаралар қолға алынды?
– Қалалық Жастар саясаты мәселелері жөніндегі басқарманың бастамасымен жыл бойы Елбасының «Қазақстан-2050» стратегиясы: қалыптасқан мемлекеттің жаңа саяси бағыты» атты Жолдауы аясында еңбек нарығында сұранысқа ие жұмысшы мамандықтарын насихаттауға арналған «Менің дұрыс таңдауым!» атты акция өткізілуде. Акция төңірегінде техника саласында, атап айтсақ, инженер, фрезерші, электрик, сантехник, дәнекерлеуші, аспаз мамандықтарында және медицина саласында оқитын бір топ студент жастар үгіт-насихат жұмыстарына белсене атсалысып жүр. Әлеуметтік желілерде жүргізілетін жұмыстарымыз да бар. Сонымен бірге биылғы 17 маусымда Астана қаласының темір жол және автовокзал ғимараттарында жастарды жедел жұмысқа орналастыру пунктін аштық.
– Жаңа жобаның нәтижесі қандай?
– Бұл жұмысты бастағалы бері бас қалада 80 жас маман жұмыспен қамтылды және олардың 200-ден астамы жұмысқа орналасуға жіберілді. Жалпы, біз осы жоба негізінде соңғы екі айдың ішінде елордаға келген жастардың санын анықтадық. Бұл ретте Астанаға бірінші кезекте Оңтүстік Қазақстан облысынан жастар көп келетіні белгілі болды.
Бүгінде елордада 14 066 студент бар. Бірінші курсқа қабылданғандардың арасында еңбек нарығында сұранысы төмен мамандықтарды таңдағандар қатары 16 пайызға азайған. Бұл – біз үшін үлкен жетістік. Орташа есеппен алғанда 2017 жылға қарай Астана қаласында еңбек нарығы бір қалыпқа келеді.
Жалпы студенттердің 9 мыңы – жан-жақтан келгендер. Демек, Астана – арманшыл жастардың қаласы. Меніңше, мемлекеттік жастар саясатының жаңа басымдықтары мен міндеттерін айқындау, ел дамуы үшін еңбек ету барлық жастардың ортақ мақсаты болуы керек. Өйткені, жиырма бірінші ғасырдың
жастары – жігерлі әрі жаңашыл. Сондықтан, олардың бастамаларын жан-жақты қолдап, жүзеге асыруға біз әрқашан да әзірміз.
Гүлбаршын ӨКЕШҚЫЗЫ