ҚР Тұңғыш Президенті музейінде «Тарихи таңдау. Жасампаздық» атты тақырыптық қор көрмесі ашылды.
Тәуелсіз Қазақстанның негізін қалыптастырған уақиғаларды кең ауқымда көрсетуді мақсат еткен экспозицияға хронология бойынша әр жылдың тарихынан сыр шертер бірегей мұрағат құжаттары қойылды. Олар Қазақстанның даму жолындағы Елбасының басты қадамдарына назар салуға мүмкіндік береді.
Сондай-ақ, көрмеде 1984 жылы шыққан Нұрсұлтан Назарбаевтың «Қазақстанның шымыр келбеті» атты алғашқы кітабының көшірме қолжазбасы, ҚР Президентінің өңіріне тағатын белгісі, ең жоғары дәрежелі ерекшелік белгісі – «Алтын қыран» ордені, Қазақстанның тұңғыш ғарышкері Тоқтар Әубәкіровтің қолғабы, 1994 жылы Талғат Мұсабаев ғарыштағы сапарына алып барған Байқоңырдың бір уыс топырағы салынған капсула сияқты құнды жәдігерлер де көрініс тапты.
1991 жылдың 1 желтоқсанында жасалған тарихи таңдаудың дұрыстығын паш ететін аталмыш көрме 2015 жылдың 30 қаңтарына дейін жалғасады.
Мәдина ЖАҚЫП
