«Тар заманнан» тарихи шындықты көресің
Астанадағы «Kinopark» кинотеатрлар желісінде «TAR ZAMAN» көркем фильмінің алдын ала көрсетілімін тамашалау мүмкіндігіне ие болдым. «QAZAQSTAN» ұлттық телеарнасы Алаштың 100 жылдығына орай түсірген жаңа телехикаядан ғаламат әсер алдым.
14 желтоқсаннан бастап «Kinopark» кинотеатрлар желісінде көрермендерге көрсетіле бастаған жаңа туынды Алаш тарихының бір кезеңін қамтиды. Фильм өте сәтті, сапалы, әсерлі болып шыққан. Ең бастысы, Алаш көсемдері мен қайраткерлерінің бейнесі сәтті сомдалған. Тарихи шындық салтанат құрғанын көресің. Фильмдегі оқиғалар желісі Алашорда үкіметін құруды мұрат еткен Алаш зиялыларының өмірін бейнелейді. Атап айтқанда, Алаш арыстары – Мұстафа Шоқай, Ахмет Байтұрсынұлы, Міржақып Дулатұлы, Смағұл Сәдуақасұлы және т.б. образы көрініс тапқан. Негізінен алғанда, фильмнің басты кейіпкері – Алаш көсемі Әлихан Бөкейханның тұлғалық бейнесі де толық ашылған. Мұны Әлекеңнің Алаш зиялыларымен, өз төңірегіндегі тарихи тұлғалармен қарым-қатынасынан, күрескерлік қызметінен, қайраткерлік көзқарасы мен ұлттық ұстанымынан, тағдыры мен махаббатынан көріп, барлық қырынан тани түсесің.
Қазақ даласында кеңес өкіметі орнаған кезеңдегі аласапыран. Қазан төңкерісінен кейін қазақ жұртының неге екіге бөлінгені фильмдегі басты оқиғаға арқау болған. Өз ұлтына шексіз берілген Алаш арыстарының әр қадамы, әр қарекеті шынайылықпен суреттелген. Фильмнің режиссерінің бір шеберлігі, большевиктерге берілген жас ақынның сатқындығын көрсету арқылы осы қасіреттің бүгінге дейін жеткенін бейнелейді. Бұл жерде режиссер Мұрат Бидосовқа ерекше алғыс айтуымыз керек. Фильмнің музыкасы да тамаша жазылған. Оқиғаларының шиеленісуі де бір-бірімен тұтасып, сол тар заманның шындығын көз алдыңа әкеледі. Әсіресе, Әлихан Бөкейханның өз серіктеріне қарап: «Ұлтқа қызмет ету үшін мінез керек!» деген сөзі өте әсерлі шыққан. Фильмде Омбы, Семей қалаларындағы қым-қуыт оқиғалар, Алаш әскерінің құрылуы, Әлекеңді Сталиннің Мәскеуге шақыруы, абақтыдағы тергеу шаралары анық, нанымды етіп суреттеледі. Жаңа туындыны көріп отырып, сол заманның шым-шытырық оқиғаларына дендеп, керемет әсерге бөленесің. Көркем шығарма Әлихан Бөкейханның Алашқа аманат еткен бес ұстанымымен түйінделеді.
Бір қуанарлығы, 12 сериядан тұратын жаңа туынды жақында «QAZAQSTAN» ұлттық телеарнасынан көрсетіле бастады. Түрік пен үндінің сағызша созылған сериалдарынан шаршаған қазақ көрерменін «Тар заман» ерекше қуантатыны анық.
Төлен ТІЛЕУБАЙ