Елордадағы дін қызметкерлеріне Мемлекет басшысы Нұрсұлтан Назарбаевтың «Нұрлы жол – болашаққа бастар жол» атты Жолдауы түсіндірілді.
«Елбасы өзінің әр Жолдауында толеранттық туралы, конфессияаралық және ұлтаралық бірлік жайлы айтады. Аталған ұғымдар мемлекетіміздің басты құндылықтары қатарына жатады. Көп елде, тіпті ТМД-ға кіретін кейбір мемлекеттерде бұл жоқ. Этносаралық жанжалдар мен діни қақтығыстар туындап, кері кетушілік байқалуда. Әрине, мұндай жағдайлар кез келген мемлекетті алға жылжытпайды. Мемлекет басшысы сол себептен дамуды тежейтін әлемдік дағдарысты есепке алып, өз Жолдауын әдеттегідей жыл басында емес, жылдың аяғында жолдады. Түрлі қақтығыстардан ең алдымен халық зардап шегеді. Ал, Елбасының әр Жолдауы халықты әлеуметтік тұрғыдан қолдауды көздейді. Сол халыққа ең жақын жүретін – сіздерсіздер. Жақында жарияланған жаңа Жолдауда әлемдік дағдарыс қазақстандықтарға әсер етпейтіндей шарттар белгіленді. Ел арасында соны айта жүрсеңіздер екен деп өздеріңізді жинап отырмыз» деген Астана қаласының Дін істері жөніндегі басқармасының басшысы Жорабек Дәуренов шараның мақсатын айқындап берді.
Одан кейін ол Жолдауда көрсетілген бағыттарға тоқталды. Бір-бірінен шалғайда жатқан қалаларды байланыстыратын маңызды жолдардың құрылысы жайлы айтқанда, бұл іс, әсіресе, Астананы еліміздегі өзге өңірлермен жақындастыруға және сауда нарығының ауқымын кеңейтуге мол мүмкіндік ашатынын атап өтті. Халықтың тұрмысын жақсарту мақсатында энергетикалық инфрақұрылымды дамыту, тұрғын үй-коммуналдық шаруашылықты, сумен және жылумен қамтамасыз ету жүйелерін жаңғырту істері жүргізілетінін, бұл жұмыстарға қомақты қаржы бөлінгенін жеткізді.
Бұдан соң сөз алған Еуропалық құқық және адам құқықтары сарапшылық институтының директоры Марат Башимов Елбасы «Нұрлы жол – болашаққа бастар жол» Жолдауы арқылы келесі жылы мемлекетімізде атқарылатын істердің жоспарын нақты айқындап бергенін айтты. «Елбасымыздың Жолдауы жайлы пікір білдірген әлемдік сарапшылар оның көрегендігіне таңғалуда. Өз Жолдауын Жаңа жылға екі ай қалғанда жариялаған Нұрсұлтан Назарбаев басы қайырылуы тиіс істерді Үкіметке көрсетіп, келесі жылы алдымыздан шығуы мүмкін қиындықтардың алдын алды» деген ол Мемлекет басшысының елімізде татулық пен бірлікті сақтаудағы еңбегіне тоқталды.
Оның сөзін жалғаған қала әкімдігінің Дін проблемаларын зерттеу орталығы директорының орынбасары Есбосын Смағұлов діни тұрғыдан туындауы мүмкін түйткілдерді ашып көрсетіп, олардың бір факторы ретінде халықтың әлеуметтік жағдайының төмендігін атап өтті. «Бізде халықтың әлеуметтік ахуалы жаман емес. Елбасы қазақстандықтардың жағдайын үнемі назарда ұстайды» деді Е.Смағұлов.
Діни қызметкерлердің атынан сөйлеген астаналық христиандық-евангелиялық шіркеуінің пасторы Александр Клюшев пен «Шейх Құнта қажы» мешітінің бас имамы Жақия қажы Исмаилов Мемлекет басшысының Жолдауын қолдайтындықтарын айтып, осы жерде естігендерін жамағатқа тарататындарын жеткізді.
Аманғали ШМИТҰЛЫ
