ТАТУ ОТБАСЫ ТАҚСІРЕТ ТАРТПАЙДЫ
Қазақстан халқы ассамблеясының аясында бүкіл республика бойынша облыстық, аудандық, ауылдық деңгейде құрылған 210-ға жуық аналар кеңесі жұмыс істейді екен. Мұндай дерек 13-14 қарашада Астанада өткен Республикалық аналар кеңесінің форумында айтылды.
Форумның ашылу салтанатында сөз сөйлеген Қазақстан халқы ассамблеясы төрағасының орынбасары Ералы Тоғжанов татулық пен тағаттылық, тәрбие бастауларын талқыға салатын, тәжірибе алмасатын пікірталас алаңы Елбасы Нұрсұлтан Назарбаевтың «Нұрлы жол – болашаққа бастар жол» атты халыққа Жолдауының жариялануына сәтті орайласқанын атап өтті.
– Баршаңызға мәлім, бізде таяуда «Медиация туралы» заң қабылданды. Бірақ, менің ойымша, нағыз медиатор, яғни, мәмілегер – салиқалы ұрпақтың тәрбиешісі саналатын аналар, – деп өз пайымын білдіре кеткен Ералы Лұқпанұлы Елбасы Жолдауынан оған дәйексөз де келтірді.
– «Тұрақтылық пен келісім дегеніміз не? Ол – отбасылық әл-ауқат, қауіпсіздік, баспана. Бейбітшілік – ол әке мен ана қуанышы, ата-аналар денсаулығы және біздің балаларымыздың бақыты. Бейбітшілік – ол тұрақты жұмыс, жалақы және ертеңгі күнге деген сенім. Бейбітшілік пен тұрақтылық – күн сайынғы еңбекпен қорғап, нығайтуды қажет ететін жалпыхалықтық жетістік. Мен жастар – біздің болашағымыздың тірегі дегенді әркез айтып келемін» дей отырып, Елбасы ауызбіршілікте болудың қарапайым қағидаттарын қазақстандықтарға жеткізе білді. Ал, Қазақстан халқы ассамблеясы – осы құндылықтар сіңірілетін үлкен
тату отбасы деді ол.
Форум барысында білгеніміздей, аналар кеңесінің оңды тәжірибесі жайында мысал көп. Мысалы, шығыс қазақстандық әйелдер халық қолөнерін жаңғыртып жатыр. Қостанай облысында іскер отағасылардың клубы тәртібі нашар жасөспірімдерді қамқорлығына алыпты. Ал, Талдықорғанда аналар кеңесінің белсенді жұмысының арқасында бірталай отбасы ажырасудан аман қалыпты.
Керегесінің қиюы мен жүгінің жиюы тиянақты, яғни, үйелмен үйлесімі сақталған тату отбасы тақсірет тартпайтынын түйіндеген форумда ҚР Президенті жанындағы Әйелдер ісі және отбасы-демографиялық саясат жөніндегі кеңестің мүшесі, репродуктор-дәрігер Салтанат Байқошқарова, Парламент мәжілісінің
депутаты Егорь Каппель, Оңтүстік Қазақстан облысының әйелдер кеңесінің төрағасы Гауһар Төлеповалар сөз сөйлеп, аналардың денсаулық жағдайы, әйелдер құқығын қорғау, салт-дәстүр мен тілді, мәдениетті сақтау сияқты мәселелер бойынша мәйекте ойларын ортаға салды. Форумның алғашқы күнінің нәтижесінде қатысушылар Елбасы Нұрсұлтан Назарбаевтың атына үндеу жолдады.
Әділ АЛАШ