Астанадағы Б.Момышұлы даңғылында орналасқан Достық үйі осыдан алты жыл бұрын ашылған еді. Әсем ғимарат 2018 жылы қаланың 20 жылдығына орай Маңғыстау облысының сый тартуы болатын. Сол уақыттан бері барлық этнос өкілдерін біріктіретін ортақ үйде қазіргі кезде 20-дан астам этнобірлестік бар.
Сондай-ақ 11 Жастар қанаты, Ғылыми-сараптамалық топ, Ақсақалдар кеңесі, Аналар кеңесі, «Ассамблея жастары» ұйымының қалалық штабы, «Жыр орталығы», «Парасат» қайырымдылық қызметін үйлестіру орталығы, «Аналар аманаты» қолөнер шығармашылық орталығы, «Мәміле» қазақ тілі клубы жұмыс істейді. Оған қоса, мұнда 50-ден астам шығармашылық ұжым қызмет етеді. Достық үйінің ғимаратында тұрақты түрде мерекелік қабылдаулар, кездесулер өткізіліп тұрады.
Заңнамаға сәйкес еліміздегі барлық Достық үйлеріндей, мұнда да ауқымды жұмыстар жоспарланған. Оған Ассамблея қызметіне қатысты қоғамдық келісім кеңестерінің, ғылыми-сараптамалық топтың және басқа да құрылымдардың жұмысын ұйымдастыру кіреді.
Этномәдени бірлестіктерге қолдау көрсету, еліміздегі барлық этникалық қауымдастықтар мен топтардың қоғамдық өмірдің барлық салаларына толық қатысуын бақылау. Этносаралық және конфессияаралық келісім мен ынтымақтастық, рухани бірлік пен патриотизм идеяларын қалыптастыру және тарату сияқты жұмыстар қарастырылған.
Елордадағы барлық этностардың тарихи, мәдени және рухани мұраларын сақтау үшін үйірмелер, секциялар, орталықтар құру, олардың арасында төзімділік пен өзара құрмет ахуалын қалыптастыру да осы үйдің басты міндеттеріне кіреді.
Қазақстан өңірлерінде тұратын этникалық топтардың үздік дәстүрлерін, әдет-ғұрыптарын қайта құру және насихаттау, оларды жас ұрпақты тәрбиелеу процесінде пайдалану, құндылықтар мен бүкіл Қазақстан халқының ортақ тарихи өткендігі негізінде өзін-өзі тануға ықпал ету бойынша семинарлар, конкурстар, акциялар, ғылыми жобалар өткізу арқылы этностар татулығы артады.
Жергілікті және республикалық ұйымдар мен мекемелерде тренингтер мен біліктілікті арттыру, мемлекеттік және қоғамдық ұйымдардың тренингтері мен семинарларына қатысу арқылы Достық үйлері мамандарын даярлау және қайта даярлау – бұл да басты міндет.
Аталған міндеттер ойдағыдай атқарылып келеді. Достық үйінің бірінші қабатында мәжіліс залы, би залы, студия, кітапхана, медиация кабинеті, екінші қабатта конференция залы мен этномәдени бірлестіктерге арналған кабинеттер бар. Ал конференция залында күнделікті әртүрлі тақырыпта жиындар мен дөңгелек үстелдер ұйымдастырылады.
Ал әр этномәдени бірлестіктердің бөлмелері сол елдің тарихы мен мәдениетінен және салт-дәстүрінен сыр шертеді. Қолөнер туындылары да осында қойылған. Мұнда келушілер кез келген ұлттың мәдениетімен осылайша таныса алады. Әр ұлттың ұлттық биі мен ана тілінен сабақтар өткізуге жағдай жасалған.
Аналар кеңесінде тегін қызмет көрсететін клубтар жұмыс істейді. Олардың қатарында «Қазақ салт-дәстүрінің қолөнері», тоғызқұмалақ ойынына үйрету, ат спорты клубтары бар. Ғимараттың ішінде АНК Live тікелей эфир студиясы бар. Соңғы техникамен жабдықталған студияға онлайн-брифингтер өтеді.
Бүгінде барлық ұлт пен ұлыс өкілі бір шаңырақтың астында татулықта өмір сүріп келеді. Олар қаладағы Достық үйінде әр мейрамда бір-бірімен қоян-қолтық араласып, ауызбіршілікте ұлттар достығын паш етіп жатыр.
Айгүл УАЙС
