Астана бұл күнде тек, саяси-экономикалық орталық қана емес, адамдар барлық аймақтардан емделуге келетін медициналық орталыққа да айналды. Осыған байланысты шаһарда жаңа емханалар ашу міндеті тұр. Біз осы тұрғыда Астана қаласы Денсаулық сақтау басқармасы емдеу ісі жөніндегі бөлімнің басшысы Мұратжан Қажығалиевты әңгімеге тарттық.
– Елорда емханаларында кезек көп дегенге не айтасыз?
– Қазіргі уақытта еліміздің бас қаласына қоныс аударушылар саны артып отыр. Орта есеппен жыл сайын ресми деректер бойынша 35-40 мың адам көшіп келеді. Бұл халыққа қалыпты медициналық көмек көрсетуде белгілі бір қиындықтар туғызатыны да рас. Дегенмен, елорданың тұрақты тұрғындары тұрғылықты жерлеріндегі емханаларға бекітілген. Сол арқылы медициналық көмекпен қамтамасыз етіледі. Шұғыл жағдайларда адамдарға тұрғылықты жеріне, азаматтығына қарамастан, медициналық көмек көрсетіледі.
– Жаңа емхана ашу жоспарда бар ма?
– Былтыр Аманат көшесінде барлық жағдайы бар №6 емхана кешені пайдалануға берілген болатын. Енді Жамбыл, Алматы және Сейфуллин көшелері аумағында 1 ауысымда 500 ересекпен, 250 баланы қабылдай алатын амбулаториялық емхана кешені салынып жатыр. Оны 2013 жылдың ІV тоқсанында пайдалануға беру жоспарланған. Бұл сол ауданда тұратын мемлекеттік қызметкерлерге ыңғайлы болуымен қатар, сол маңдағы 2,4,5 емханалардың жүктемесін азайтады. Кешен Елбасының «100 аурухана, 100 мектеп» бағдарламасы бойынша қолға алынды. Тағы бір айта кетерлігі, мұнда қалалық «Жедел жәрдем» стансасының бір бөлімшесі ашылмақ.
Осы амбулаториялық-емхана кешені АҚШ, Германия, Израиль, тағы басқа да мемлекеттерден әкелінген заманауи құрал-жабдықтармен жабдықталған. Керекті маман-кадрлар конкурс бойынша жинақталуда.
– Емдеу ісінде қандай өзгешелік бар?
– Бұл жерде тегін берілетін дәрі-дәрмекті айтуға болады. Егер 2011 жылы 36 ауру түріне 300-ден астам дәрі-дәрмек тегін беріліп келсе, 2012 жылдың қаңтарынан бастап бұл тізімге өзгеріс енгізілді. Мәселен, бұған дейін қан қысымы жоғары, жүрегі шаншып ауыратын, өкпесі қабынған, өкпенің созылмалы дертіне ұшыраған, жүрек қызметі нашарлаған, асқазан мен ішек жарасы бар науқастар дәріні 50% жеңілдікпен алып келсе, енді олар бюджет
есебінен тегін алады. Жалпы ақысыз берілетін дәрі-дәрмектердің саны 140-қа жетті. Емдеу ісіндегі өзгешеліктің бірі осы.
Таңатар Төлеуғалиев
