Жыл басынан бері Астана қаласының Жұмыспен қамту орталығына жұмыс іздеп 3 536 адам жүгінсе, олардың 55%-ы – 29-ға дейінгі жастар.
«Жұмыспен қамту-2020» мемлекеттік бағдарламасының «Оқыту және жұмысқа орналасуға көмектесу» бағыты бойынша Астанада 535 кәсіби білім алу қарастырылған. Жұмысқа орналастыруды барынша тиімді ету үшін кәсіби тәжірибеге жіберілетін адамдармен төрт жақты әлеуметтік келісімшарт жасалады. Сонымен қатар, бағдарламаның әрбір қатысушысымен жұмыс берушінің талаптарын және жұмыссыздың ниет-тілектерін талқылау бойынша жеке әңгімелесу өткізіледі.
Астанадағы тапшы мамандықтарды анықтау үшін арнайы орталық мониторинг жүргізеді. Қазіргі кезде еңбек нарығында техникалық және құрылыс мамандарына сұраныс жоғары. Атап айтқанда, өнеркәсіптің түрлі салаларындағы инженерлер, соның ішінде инженер-механик, инженер-жобалаушы, инженер-энергетик, даяшылар, аспаз, монтаждаушылар, электр маманы, электромонтаждаушы-реттеуші, газэлектрдәнекерлеушілер, сантехниктер, темір ұсталары, қырнаушылар жетіспейді.
Биыл қыркүйек айында тоқсан жеті адам он айлық кәсіби даярлау курсына оқуға жіберілді. Мамандар Астана қаласы әкімдігінің Энергетика және байланыс, Даналық және Басқару колледждерінде даярланды. Жүз алпыс төрт адам газ-электр дәнекерлеуші, тігінші-үлгіші, тәрбиелеуші, электр маманы, сатушы-кассир, аспаз мамандықтарын жаңадан меңгерді.
Кәсіби машықтарын арттырғысы келетіндерге арналған бухгалтер, қойма меңгерушісі, медбике, тәрбиеші, ағылшын тілі, ыммен сөйлеу аудармашысы, аспалы кран машинисі курстары бар.
«Жұмыспен қамту жол картасы – 2020» бағдарламасы аясында жастарға лайықты жұмыс орындарын ұсынудан басқа, 6 айлық жастар практикасына қатысу мүмкіндігі беріледі.
Кәсіби оқыту аяқталған соң оқу орталығы бағдарламаға қатысушыларды жұмыс берушілердің берілген өтініші бойынша тұрақты жұмыс орындарына жібереді.
Сағи ОРАЛ
