Астананың инфрақұрылымын дамытуда экологиялық таза көліктерге арналған тұрақтар мен веложол мәселесі жиі көтеріледі. Жақында Сәулет және қала құрылысы басқармасы оған да қолайлы жағдай туғызуды қолға алатынын мәлімдеді.
Тарата айтсақ, таяу болашақта Сарыарқа көпірінен Тельман елді мекеніне дейін велосипедшілерге арналған спорттық-сауықтыру бағытындағы кешенді инфрақұрылым түзіледі. Сәулет және қала құрылысы басқармасының басшысы Виталий Силецкий: «Жолдың ұзындығы 22 шақырымдай болады. Ол жерде көлік тұрағы, велосипедті жалға алу пункттері, ұсақ-түйек керек-жарақ сататын, қызмет көрсететін орындардың болуын қарастырамыз. Оған қоса, қаламызда осыған сұранып тұрған сегіз маңызды бөлік бар. Мәселен, біреуін біз Ильинка елді мекенінде жасаймыз. Қаланың ескі бөлігінде Есілдің жағалауын пайдаланамыз. Яғни, бір сөзбен айтқанда спорттық-дене шынықтыру бағытындағы веложолдар салуға мүмкіншілігіміз жетеді. Ал, оны көлік жүйесіне кіріктіру өз алдына бөлек мәселе. Ол үшін жаңа нормативтер енгізуге тура келеді» дейді.
