Қалалық мәслихаттың кезектен тыс жиырма екінші сессиясының жұмысына Астана әкімінің орынбасарлары Е.Нағаспаев, А.Балаева, аудан әкімдері, «Нұр Отан» ХДП Астана қалалық филиалы төрағасының орынбасары С.Ахметов және елордалық басқарма басшылары мен қоғамдық бірлестіктердің өкілдері қатысты.
Сессияда бес мәселе қарастырылды. Алдымен қалалық мәслихаттың №12 округі бойынша депутат Жарқын Жанғожаұлы Жұмағұловтың өтініші қарастырылып, Астанадан сыртқарырақ орналасқан елді мекенге мемлекеттік қызметке ауысына байланысты оның депутаттық өкілеттілігі мерзімінен бұрын тоқтатылды.
Сонымен бірге елордалық тексеру комиссиясының жаңа мүшелері тағайындалып, терроризмге қарсы күрес комиссиясының құрамы бекітілді.
Астана қаласы әкімі аппаратының мемлекеттік-құқықтық бөлімінің жетекшісі Дәулет Досқұловтың айтуынша, елорда әкімдігінің қаулысына сәйкес, қала әкімдігі жанынан Астана қаласының терроризмге қарсы күрес комиссиясы құрылған болатын. Ол терроризмге қарсы әрекет ету саласында мемлекеттік органдардың қызметін үйлестіруді жүзеге асырады. Ал, терроризмге қарсы күрес комиссиясының төрағасы – Астана қаласының әкімі Иманғали Тасмағамбетов. Аталған комиссия құрамында Астана қаласы әкімінің орынбасарлары, аумақтық бөлімшелердің басшылары, жергілікті өзін-өзі басқару органдарының өкілдері бар. Олар орталық-мемлекеттік органдардың және жергілікті басқару органдарының терроризмнің алдын алу және терроризмнің салдарын жою жөніндегі қызметтерін үйлестіруді жүзеге асырумен бірге, терроризмге қарсы әрекет ету саласында мемлекеттік саясатты орындауды басты міндетіміз деп санайды.
Гүлбаршын ӨКЕШҚЫЗЫ
