Халық пен халықтың қарым-қатынасын арттырып, ұлт пен ұлысты үндестіретін, жалпақ жұртты жақындастыратын, баршамызды бір-бірімізбен байланыстыратын басты құрал – тіл. Алаш арысы Ахмет Байтұрсынов ХХ ғасыр басында «Тілі жоғалған ұлттың өзі де жоғалады» деп кесіп айтқан. Бүгінде қоғамда қордаланып, талайлардың талас-тартысын тудырып жүрген ең үлкен мәселе де осы. Жаһандану дәуірінде салт-дәстүріміздің сәт сайын санада жаңғыруы, тіліміздің уақыт көшінен қалмай, өркениет талаптарына сай дамуы ұлтжанды қауымды алаңдататып отырған мәселелердің бірі.
Қазақстан Республикасы Президентінің 1998 жылғы 20 қаңтардағы Жарлығымен қыркүйектің үшінші жексенбісі «Қазақстан халқы тілдерінің күні» деп белгіленген. Осыған сәйкес республика көлемінде қазақ тілін кеңінен насихаттау назарға алынып, жыл сайын Қазақстан халқы тілдерінің фестивалін өткізу дәстүрге айналды. Елордамыздағы биылғы XVI қалалық тіл фестивальдің ашылу салтанаты 5 қыркүйекте «Астана» ұлттық сурет галереясында өтті.
Бұл шараға зиялы қауым өкілдері, ҚР Парламент Мәжілісінің және Астана қалалық мәслихатының депутаттары, ардагерлер, мемлекеттік мекемелердің, ұлттық-мәдени орталықтар мен «Мемлекеттік тіл» қоғамдық қозғалысының, «Қазақ тілі» қоғамының, үкіметтік ұйымдардың басшылары, мектеп оқушылары мен ЖОО-ның студенттері, Астана қаласындағы 68\665 әскери бөлімінің құрмет-қарауыл ротасының сарбаздары қатысты.
Мемлекеттік тілдің мәртебесін асырып, қоғамдағы рөлін арттыру, қолданыс аясын кеңейту, ұлттық құндылықтарды насихаттау мақсатында ұйымдастырылған мерекелік концертке Қ.Қуанышбаев атындағы мемлекеттік академиялық Қазақ музыкалық драма театры әртістерінің қатысып, әдеби қойылымдар көрсетті. Бауыржан Исаев, Маржан Арапбаева, Жаңабай Өтегенов сынды жас әншілер жиылған жұртшылыққа әсем әуен тарту етті. Сондай-ақ, «Наз» би театрының бишілері сахнада қазақтың көркем биін мың бұрала билесе, айтыстың ақтаңгер ақындары Балғынбек Имашев пен Әсем Ережепқызы айтысып, ұлтымыздың ұлағатын, жалпы қазақ руханиятының көкейкесті мәселелерін жырларына арқау етті.
Қуат Қиықбай
