Н.В. Гоголь атындағы Қарағанды облыстық әмбебап-ғылыми кітапханасында белгілі журналист-публицист, медиа зерттеуші, ҚР Президентінің БАҚ саласындағы сыйлығының лауреаты Төлен Тілеубайдың «Түлкілітаудың аспаны» атты жаңа кітабының таныстырылымы өтті. Кездесу аясында оқырмандар назарына «Төленнің жүрек лүпілі» атты кітап көрмесі ұсынылды. Сондай-ақ, автордың «Түлкілітаудың аспаны» кітабына арналған оқырмандардың жүрекжарды пікірлерінен құралған арнайы жинақ таратылды.
Бұл іс-шара оқырман қауымға қаламгер шығармашылығын тереңірек танып, жаңа қырынан бағалауға мүмкіндік берді. Рухани кешке ақын-жазушылар, мәдениет және қоғам қайраткерлері, журналистер, ғалымдар, өлкетанушылар, ұстаздар, кітапханашылар, студенттер мен мектеп оқушылары қатысты.
Таныстырылымның тізгінін жас журналист, «Егемен Қазақстан» газетінің Қарағанды облысы бойынша тілшісі Қасымхан Ғалым ұстады. Таныстырылым барысында шығармашылық жүздесуге арнайы келген белгілі алаштанушы зерттеуші, өлкетанушы қаламгер Тұңғышбай Мұқан, аудармашы-зейнеткер Рымбала Смайылова, тележурналист Әли Тойжігіт, «Арқа ақшамы» газетінің бас редакторы, сатирик Әдебиет Белгібайұлы, Қазақстанның еңбек сіңірген ұстазы, ҚР Білім беру ісінің үздігі Сәбира Құлпейісова, медиа маманы, ұлағатты ұстаз Жанар Қожа, балалар жазушысы, тіл күрескері Жұпар Жақан, Н. Гоголь атындағы Қарағанды облыстық әмбебап-ғылыми кітапхананың директорының орынбасары Гауһар Нұрланқызы, Ж. Бектұров атындағы облыстық жасөспірімдер кітапханасының басшысы Нұргүл Қаленовалар авторға, шығармашылығына қатысты құттықтау сөзі мен жүрекжарды лебізін айтты.
Жылы рәуіште өткен жүздесуде Төлен Тілеубай өзінің шығармашылық жолы, жаңа кітабының мазмұны туралы кеңінен әңгімелеп, оқырмандармен ой бөлісті. Автор сондай-ақ балалар әдебиетіне бет бұру бағытындағы жоспарларын айтып, бұл саладағы өзекті мәселелерге тоқталды. Е.А. Бөкетов атындағы ҚарУ студенттері және А. Байтұрсынұлы атындағы гимназияның, «Білім-Инновация» лицей-интернатының, «ДАРЫН» мамандандырылған мектеп-лицей-интернатының, №19 жайлы мектебінің оқушылары кітап авторына сауалдарын қойып, ондағы көркем шығармалар туралы өз пікірлерін ортаға салды. Ашық диалог алаңында басқа да қатысушылар Төлен Тілеубайдың шығармашылығына тоқталып, медиа, ғылым, публицистика және әдебиет салаларының дамуына қосып жүрген үлесін атап айтты.
Әсерлі де мағыналы кештің соңында автор қатысушылардың сұранысы бойынша кітаптарына қолтаңба қойып, естелікке суретке түсті. Бұл сәт әсіресе журналистика мен әдебиетке қызығушылығы зор жастарға, оқушыларға ұмытылмас әсер қалдырды. Кітапхана ұжымы мен оқырмандар қауымы қаламгердің шығармашылығына сәттілік тілеп, алдағы уақытта да осындай әдеби кештер жалғасатынына сенім білдірді.
Сандуғаш Телпекбаева,
Өлкетану әдебиеттері бөлімінің басшысы
